गलेश्वर ।
म्याग्दीको एक मात्र नगरपालिका बेनी नगरपालिकाले बेनी बजारलाई सुरक्षित बनाउन बाढीको निकासका लागि व्यवधान बनेका दुई घरलाई खरीद गरेर बाढीको सहज निकास दिने र पिपलडाँडामा ‘शान्ति सङ्ग्रहालय’ बनाउने निर्णय गरेको छ ।
बेनी नगर कार्यपालिकाको बैठकले बर्खामा बजारमाथिको पाखोबाट आउने बाढीलाई सहजरुपमा निकास दिन र व्यवस्थापन गरी बेनी बजारको क्याम्पस चोकलाई सुरक्षित गर्न बाढीको निकासका लागि व्यवधान बनेका स्थानीय मीन सापकोटा र विष्णु शर्माको घरलाई किनेर बाढीको सहज निकास गराउने निर्णय गरेको हो ।
त्यसैगरी बैठकले गण्डकी प्रदेश सरकारसँग लागत सहभागितामा नगरपालिका क्षेत्रबाट काठका पोललाई विस्थापित गरेर स्टिलका पोल राख्ने योजना कार्यान्वयन गर्ने, बेनपा– ४ तातोपानी र ९ गलेश्वरमा प्रहरी चौकीको भवन निर्माणमा लागत सहभागिता जनाउने निर्णय भएको छ ।
सम्पत्ति तथा भूमिकरसम्बन्धी विवाद समाधानका लागि नयाँ सीमा र मापदण्ड निर्धारण गरिएको छ । बेनपा–२ पिपलडाँडामा शान्ति सङ्ग्रहालय बनाउन सम्बन्धित निकायमा सिफारिश गर्ने र विपद् व्यवस्थापन तथा आपत्कालीन अवस्थाका लागि आवश्यक वडामा सुरक्षा निकाय र विपद् व्यवस्थापन समितिसँगको सहकार्यमा हेलिप्याड बनाउने निर्णय गरिएको छ ।
यसैगरी बेनपा–७ मङ्गलाघाटका रेशम बानियाँ र सम्झना पन्थ तथा बेनपा– ४ का केदार आचार्य र सुनिता सुवेदीले जन्माएका तिम्ल्याह बच्चाको उपचारका लागि ३०÷३० हजार रुपैयाँ आर्थिक सहायता प्रदान गर्ने निर्णय भएको छ ।
बैठकले दुई कार्यविधि, एक निर्देशिका र एक मार्गदर्शन पनि पारित गरेको छ । नगरप्रमुख हरिकुमार श्रेष्ठको अध्यक्षतामा बसेको बैठकले राजपत्र प्रकाशन कार्यविधि २०७५, अपाङ्गता भएका व्यक्तिको परिचयपत्र वितरणसम्बन्धी कार्यविधि, स्वास्थ्य संस्था दर्ता अनुमति तथा नवीकरणसम्बन्धी निर्देशिका र पशुसेवा कार्यक्रम सञ्चालन मार्गदर्शन २०७५ पारित गर्ने निर्णय गरेको छ । रासस
© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.