काठमाडौँ ।
त्रिभुवन विश्वविद्यालयले आफू मातहतमा सञ्चालित वार्षिक परीक्षामा संलग्न शिक्षक, कर्मचारी तथा सुरक्षा कर्मचारीको पारिश्रमिकमा संशोधन गरेकोे छ ।
यही साउन २ गते सम्पन्न कार्यकारी परिषद्को बैठकले केन्द्रीय परीक्षा सञ्चालक समितिको सिफारिस अनुसार पारिश्रमिकमा नौ वर्षपछि संशोधन गरेको हो । संशोधित पारिश्रमिक साउन ६ गतेदेखि सञ्चालन भएको चारवर्षे स्नातक तह दोस्रो वर्षको परीक्षादेखि लागू भइसकेको त्रिविवि सूचना तथा जनसम्पर्क महाशाखाले आज विज्ञप्तिमार्फत् जनाएको छ ।
अब स्नातक तथा प्रवीणता प्रमाणपत्र तहको परीक्षामा केन्द्राध्यक्षको पारिश्रमिक रु ८०० पुर्याइएको छ । यसअधि रु ४५० रहेको थियो । सहायक केन्द्राध्यक्ष, निरीक्षकको दोब्बर अर्थात् क्रमशः रु ३०० बाट रु ६०० तथा २५० बाट ५०० पुर्याइएको छ । कम्तीमा २१ जना विद्यार्थी बराबर एकजना निरीक्षकको व्यवस्था हुने संशोधन गरिएको छ ।
त्यस्तै परीक्षा शाखामा कार्यरत कर्मचारीको पारिश्रमिक रु एक सयबाट वृृद्धि गरी दुई सय, सुरक्षाकर्मीको लागि रु ६० बाट रु १००, कार्यालय सहयोगीको रु ७५ बाट वृद्धि गरी रु १५० कायम भएको महाशाखाले जनाएको छ ।
यसैगरी, स्नातकोत्तर तहको परीक्षा केन्द्र सञ्चालनका केन्द्राध्यक्षको रु ६०० बाट रु एक हजार, सहायक केन्द्राध्यक्ष र पर्यवेक्षकको रु ४०० बाट रु ८००, निरीक्षकको रु ३०० बाट ६०० कायम गरिएको छ । यसमा पनि २१ जना विद्यार्थी बराबर एक जना निरीक्षण रहने व्यवस्था छ ।
परीक्षा सञ्चालनमा संलग्न कर्मचारीको रु १२५ बाट रु २५० सुरक्षाकर्मीको रु ६० बाट १००, कार्यालय सहयोगीको रु ८० बाट १६० पारिश्रमिक कायम गरिएको महाशाखाले जनाएको छ । पारिश्रमिक वार्षिक प्रणालीअनुसारको परीक्षामा मात्र लागू हुनेछ । -रासस
© 2018, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.