www.tandavnews.com
Fact ~ In search of truth

म्याग्दीमा बजारीकरणका कारण मानव स्वास्थ्यमा असर

गलेश्वर ।

दैनिक उपभोग्य वस्तु अनुगमनको अभाव, बढी उत्पादन गर्ने र धेरै पैसा कमाउने मोहमा कृषकले तरकारी तथा फलफूलमा जथाभावी प्रयोग गर्ने विषादी तथा अनियन्त्रित बजारका कारण मानव स्वास्थ्यमा गम्भीर असर परेको छ ।

बजारमा उपभोग गर्नका लागि सम्बन्धित कम्पनीले निर्धारण गरेको उपभोग्य म्याद नाघेका खाद्य पदार्थ, कृषकले विषादी प्रयोग गरी उत्पादन गरेका तरकारी तथा फलफूललगायत विना मापदण्ड खुलारुपमा बजारमा बिक्री भइरहेका मासुजन्य पदार्थका कारण उपभोक्ताको स्वास्थ्यमा गम्भीर असर परेको सरोकारवालाले बताएका छन् ।

जिल्ला स्वास्थ्य कार्यालय म्याग्दीले आयोजना गरेको ‘नसर्ने रोग र यी रोगबाट बच्ने उफाय’ विषयक अन्तरक्रिया कार्यत्रममा सहभागी सरोकारवालाले अनियन्त्रित बजारका कारण मानव स्वास्थ्यमा गम्भीर असर परेको बताएका हुन् ।
स्वास्थ्य कार्यालयका प्रमुख भीम आचार्यले बजारमा उपभोग्य म्याद नाघेका दैनिक उपभोग्य वस्तु महङ्गो मूल्य तिरेर खान उपभोक्ता बाध्य भएको बताउँदै विशेषगरी खाने तेल, मैदा, पीठो, अण्डा, मासु, तरकारी, फलफूललगायतका चिजबाट नसर्ने रोग (जस्तै मुटुरोग, मधुमेह,उच्च रक्तचाप नसासम्बन्धी रोग) बढी मात्रामा देखिने गरेको बताए ।

Lama collectio News Middle

खानपानमा असावधानी, तनाव र व्यस्त दैनिकीका कारण सर्ने रोगको तुलनामा नसर्ने रोगबाट मानिस बढी पीडित हुन थालेका आचार्यको भनाइ थियो । त्यसैगरी बेनी नगरपालिका–६ का अध्यक्ष एवं नगरपालिकाका कृषि संयोजक कृष्ण बानियाँले खाद्यान्नलगायतका दैनिक उपभोग्य वस्तुको अनुगमन र निरीक्षण नगरिँदा बजार अनियन्त्रित बन्दै गएको र त्यसको प्रत्यक्ष असर उपभोक्तामा पर्ने गरेको बताए ।

नागरिक समाजका अध्यक्ष सुदर्शनकुमार श्रेष्ठले भने, ‘एक बिहान म घुम्न निस्कँदा कालीगण्डकी माथिको पुलबाट एक डोका बन्दाकोभी नदीमा फाल्दै गरेको देखेँ, मैले बन्दा नदीमा फाल्दै गरेका कृषकलाई सोधेँ, हैन यसरी फाल्नुभन्दा त घरमा लगेर गाईवस्तुलाई खुवाउँदा हुन्थ्यो नि, ती कृषकले भने, “गाईवस्तुलाई खुवाउनु हुँदैन, यसमा हामीले विषादी हालेर बजारमा बेच्न ल्याएका हौँ”, श्रेष्ठको यो भनाइ सुनेर कार्यक्रममा सहभागी सम्पूर्ण सरोकारवाला पेट मिचीमिची हाँसे ।

बेनी नगरपालिकाका प्रमुख हरिकुमार श्रेष्ठले आफ्नो भनाइ राख्ने क्रममा उपभोक्ता र व्यापारी दुवै सचेत र इमानदार नहोउञ्जेलसम्म मानव स्वास्थ्यमाथिको यो खतरा टार्न नसकिने बताए ।कार्यक्रममा सहभागी प्रमुख जिल्ला अधिकारी लीलाधर अधिकारीले जनप्रतिनिधि, उद्योग वाणिज्य सङ्घ र सरोकारवालाको सहयोग लिएर बजारलाई नियन्क्रित गर्ने र अखाद्य वस्तुहरु बित्री गर्ने व्यापारीलाई कारवाही गरिने बताए । रासस

© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

Bernhardt
सम्बन्धित खवर
टिप्पणिहरु
Loading...
friends bakery