www.tandavnews.com
Fact ~ In search of truth

सीको भ्रमण लोभलाग्दो बनाउन कुनै कसर बाँकी राख्दैनौ : सञ्चारमन्त्री बास्कोटा

काठमाडौं।

Lama collectio News Middle

चीनका राष्ट्रपति सी चिनफिङको नेपाल भ्रमणलाई परिणाममुखी र सन्देशपूर्ण तथा सहकार्य एवं मित्रताको नयाँ र लोभलाग्दो उचाइमा पुर्‍याउन सरकारले कुनैपनि कसर बाँकी नराख्ने दृढता व्यक्त गरिएको छ ।

राष्ट्रपति विद्यादेवी भण्डारीको मैत्रीपूर्ण निमन्त्रणामा मित्रराष्ट्र जनवादी चीनका राष्ट्रपति सी चिनफिङबाट हुने नेपालको राजकीय भ्रमणका लागि सरकारले सम्पूर्ण तयारी पूरा गरेको बताउँदै सञ्चार तथा सूचना प्रविधिमन्त्री गोकुलप्रसाद बाँस्कोटाले भ्रमणका कार्यसूचीका विषयमा दुवै देशका अधिकारीबीच भइरहेको छलफलको प्रक्रिया सकारात्मकरुपमा अगाडि बढिरहेको उल्लेख गरे ।

मन्त्रिपरिषद्को निर्णय सार्वजनिक गर्न हिजो (बिहीबार) मन्त्रालयमा आयोजित पत्रकार सम्मेलनमा सरकारका प्रवक्ता बाँस्कोटाले भ्रमणका लागि उच्च सुरक्षा तयारी र सतर्कता कायम गरिएको र यसलाई पूर्णरुपमा सफल र ऐतिहासिक बनाउने कुरामा सबैपक्ष पूर्णरुपमा सहमत, सचेत र गम्भीर भएको बताए ।

प्रधानमन्त्री केपी शर्मा ओलीले बिहीबारै पूर्वप्रधानमन्त्री, पूर्वपरराष्ट्रमन्त्री, पूर्वराजदूत, विज्ञ तथा चीनका लागि नेपाली पूर्वराजदूतसमेतको बैठक आयोजना गरेको र उक्त बैठकमा प्रधानमन्त्रीले भ्रमणलाई ऐतिहासिक बनाउन सबैको साथ र सहयोग रहने तथा यसलाई ऐतिहासिक बनाउन भ्रमणका क्रममा कुनै प्रयास बाँकी नराखिने बताएको मन्त्री बाँस्कोटाले जानकारी दिए ।

बैठकमा दुई देशका नेताहबीचको सम्बन्ध पूर्ण विश्वासिलो बन्नुपर्छ भन्ने सुझाव आएको र सरकारले त्यसलाई सकरात्मकरुपमा ग्रहण गरेको सरकारका प्रवक्ताले बताए ।

मन्त्री बाँस्कोटाले २३ वर्षपछि चिनियाँ राष्ट्रपतिबाट हुन लागेको यस भ्रमणलाई नेपाल सरकार र नेपाली जनताले अत्यन्त भव्यतापूर्वक सफल बनाउन संकल्प गरेकाले यसलाई परिणाममुखी बनाउन सम्पूर्ण तयारी पूरा गरिएको बताउँदै भ्रमणका समयमा आपसी हितका सबै विषयमा छलफल हुने तथा नेपालले पहिलादेखि उठाएको र दुई देशबीचका सबै विषयमा सौहार्दपूर्ण अवस्थामा दुई देशका अधिकारीबीच छलफल भइरहेको जानकारी दिए ।

उनले द्विपक्षीय वार्तामा मुख्यतः रेल्वे, सडक, अप्टिकल फाइबर र विद्युतीय ट्रान्समिसन लाइन समेटिएको हिमालय सीमापार बहुआयामिक सम्पर्क सञ्जाल (ट्रान्स हिमालयन मन्टिडाइमेन्सनल कनेक्टिभिटी नेटवर्क)का विविध पक्षमा छलफल हुने र यसले दुई देशका नागरिकबीचको व्यापार सम्बन्ध बढाउने तथा उत्पादन र उपभोक्तालाई जोड्न बलियो सेतु उपलब्ध गराउने विश्वास व्यक्त गरे ।

चीनसँग जोडिने पहिलो राजमार्ग अरनिको राजमार्गको स्तरोन्नति, रसुवागढी–छहरे–काठमाडौं सुरुङ तथा रेल, अन्तरसीमा विद्युत् प्रसारण, सीमा व्यवस्थापन, किमाथांका र कोराला नाका, हिल्सा सडक र उत्तर दक्षिण करिडोरका विषयमा पनि छलफल हुने उनले जानकारी दिए ।

‘आजको चीन विश्वको महाशक्तिको रुपमा उदाएको छ र हाम्रो असल छिमेकी राष्ट्रकोरुपमा पनि रहेको छ । नेपाल यस्तो अवस्थामा छ, जहाँबाट विश्वका तीन अर्ब मानिसलाई जोड्न सकिन्छ ।

यस सम्बन्ध सेतुकोरुपमा कनेक्टिभिटीको अवधारणालाई महत्पूर्ण अगाडि बढाउन हामी इच्छुक छौं मन्त्री बाँस्कोटाले भने, दुई मुलुकबीचको सम्बन्धलाई बढी सहज बनाउन र मानवजातिले विकास गरेका सम्पूर्ण सिर्जनाको सहज उपभोग गर्न यसलाई साझा सम्पत्तिकोरुपमा प्रयोग गर्न सकिन्छ’।

‘केरुङ–काठमाडौं रेलको दूरी ७८ किलोमिटर छ । त्यसको डीपीआर (विस्तृत परियोजना प्रतिवेदन) बन्नुपर्छ । त्यसैबाट सुरुङ, पुलबारे धेरै कुरा निर्धारण हुन्छ ।

त्यसपछि लागत निस्कन्छ । ऋणका सम्बन्धमा नेपाल तथा चीनको क्षमता, नेपालको अनुरोध तथा चीनको सद्भावले निर्धारण गर्छ’–उनले भने ।

उनले दुवै पक्षबीच यस्ता विषयमा सकारात्मक ढंगले छलफल भइरहेको र भ्रमणका दौरानमा वार्ता र छलफलको क्रममा यी विषय थप परिष्कृत हुने बताए ।

उनले दुई राष्ट्रपतिबीच बैठक हुने, रात्रिभोज आयोजना गरिने, चिनियाँ राष्ट्रपति सीबाट प्रधानमन्त्री केपी शर्मा ओलीसँग औपचारिक वार्ता हुने र त्यसक्रममा परियोजना तथा चासोका विषयमा समझदारी र समझौतापत्रमा हस्ताक्षर हुने कार्यक्रम रहेको बताए ।

उनले कुनैपनि देशले सबै परियोजना कसैका लागि पनि निः शुल्क बनाइदिन नसक्ने तथा कतिपय विषय सद्भावमा भरपर्ने उल्लेख गर्दै यसमा सबै पक्षको सद्भाव प्राप्त हुने, कसैको पनि विरोध नहुने र भ्रमणलाई ऐतिहासिक र सार्थक बनाउन सिंगो देश एकताबद्ध भएर उभिएको बताए ।

‘चमत्कारिक विकास गरेको र महाशक्तिको रुपमा आएको चीनको आर्थिक, प्राविधिक तथा ज्ञानको क्षमताबाट छिमेकी मुलुक हुनुका नाताले नेपालले पनि लाभ लिनसक्छ ।

चीनसँग हजारौं वर्षदेखि र संवत्को गणनै नहुँदादेखि रहँदै आएको सद्भाव कतै पनि खल्बलिँदैन र यसमा विषयान्तर हुँदैन’–उनले भने ।

प्राकृतिक विपत्तिमा नेपाल परेको बेला चीनको महत्वपूर्ण सहयोग रहेको बताउँदै वसन्तपुर दरबार र नुवाकोट दरबार हाल पुनःनिर्माण हुँदै गरेको जानकारी दिए ।

मन्त्री बाँस्कोटाले दुई मुलुकबीच सम्बन्ध समस्यारहित रहेको बताउँदै राष्ट्रपति सीको भ्रमणलाई नागरिकरुपमा पनि तीव्र प्रतीक्षा गरिएको र सफल होस् भनेर कामना गरिएको उल्लेख गरे ।

उनले ली सियान, ज्याङ जमिनपछि सी नेपाल भ्रमण गर्ने तेस्रो चिनियाँ राष्ट्रपति भएको र यो सिंगै देशको गर्वको विषय भएको बताए ।

चिनियाँ राष्ट्रपति सीले यही असोज २५ र २६ गते नेपालको दुईदिवसीय राजकीय भ्रमण गर्दैछन् । रासस

© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

Bernhardt
सम्बन्धित खवर
टिप्पणिहरु
Loading...
friends bakery