www.tandavnews.com
Fact ~ In search of truth

बागलुङमा रगत भण्डारणका लागि उपकरण सहयोग

बागलुङ ।

Lama collectio News Middle

रेडक्रस सोसाइटी जिल्ला शाखा बागलुङद्वारा सञ्चालित रक्त सञ्चार केन्द्र सुधारको अभियान चलाइएको छ ।

रक्त सञ्चार केन्द्रलाई सुधार गरी आधुनिक बनाउनका लागि प्रवासीको सहयोग आउनेक्रम जारी रहेको छ । बागलुङ समाज बेल्जियमले रक्तसञ्चार केन्द्र बागलुङका लागि रगत भण्डारण गर्नका लागि आवश्यक उपकरण सहयोग गरेको छ ।

बागलुङ समाज बेल्जियमले रक्तसञ्चार केन्द्रमा एकै पटक २०० पोका रगत सुरक्षित भण्डारण गर्न मिल्ने आधुनिक उपकरण (फ्रिज) शनिबार हस्तान्तरण गरेको छ ।रोजगारका लागि बेल्जियममा रहेका बागलुङवासीको पहलमा संकलन गरिएको तीन लाख ७५ हजारबाट उक्त रगत भण्डारण औजार खरीद गरी सहयोग गरिएको बागलुङ समाज बेल्जियमका अध्यक्ष गङ्गा शर्माले बताए।

‘आफूहरु बेल्जियममा रहे पनि, मन तथा मस्तिष्क बागलुङमै रहेको छ’, शर्माले भने, ‘रगत अभावका कारण बिरामीले अकालमा मर्न नपरोस् भन्नका लागि भण्डारण औजार हस्तान्तरण गरेका हौँ ।’

शर्माले आगामी दिनमा रक्त सञ्चार केन्द्रलाई थप सहयोग गर्नका लागि सहकार्य गर्ने बताए । रक्त सञ्चार केन्द्रलाई थप व्यवस्थित गराउने अभियानअन्तर्गत रगत भण्डारण औजार सहयोग भएको नेपाल रेडक्रस सोसाइटी जिल्ला शाखा बागलुङका कार्यवाहक सभापति राजेन्द्र आचार्यले जानकारी दिए ।

‘रक्तसञ्चार केन्द्र अत्यन्तै संवेदनशील क्षेत्र हो’, आचार्यले भने, ‘हामीले रक्तसञ्चार केन्द्र सुधारका लागि ५० लाखको लागत अनुमान गरेका छौँ, सहयोग आउने क्रम जारी छ ।’आचार्यका अनुसार बागलुङ रक्त सञ्चार केन्द्र सुधार परियोजनाअन्तर्गत एनआएन नेदरल्याण्डले थानेश्वर कँडेलको संयोजनमा ११ लाखको एम्बुलेन्ससमेत सहयोग प्रदान गरेको छ ।

यस्तै रक्त सञ्चार केन्द्रको ल्याबलाई अत्याधुनिक तथा सेतो रगतसमेत उत्पादन गर्ने उद्देश्यअनुसार २४ लाख बराबरको ३६ प्रकारका अत्याधुनिक उपकरण रक्त सञ्चार केन्द्रलाई हस्तान्तरण हुने प्रक्रियामा रहेको नेपाल रेडक्रस सोसाइटी जिल्ला शाखा बागलुङले जनाएको छ । रासस

© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

Bernhardt
सम्बन्धित खवर
टिप्पणिहरु
Loading...
friends bakery