काठमाडौं ।
नेपालको पर्यटन क्षेत्रको विकासका लागि ग्रिसमा पर्यटन प्रर्वद्धन गरिने भएको छ ।
नेपाल पर्यटन बोर्डको सहकार्यमा नेपाल एशोसिएसन अफ टूर एण्ड ट्राभल एजेन्ट्स (नाट्टा) को संयोजकत्वमा यही कात्तिक २२ देखि २४ सम्म ग्रिसको तेसालोनिकीमा आयोजना हुने पिलोसेनिया एक्पोमार्फत नेपालको पर्यटन क्षेत्रको प्रर्वद्धन गरिने भएको हो ।
नेपालको पर्यटन उद्योगलाई अन्तर्राष्ट्रियस्तरमा प्रर्वद्धन गर्नका लागि उक्त मेलामा सहभागिता जनाउन लागेको नाट्टाका महासचिव रमेश थापाले जानकारी दिए । युरोपका मुलुकका पर्यटकलाई नेपाल ल्याउन मेलामा हुने सहभागिताले सहयोग पुग्ने उनको भनाइ छ । ‘सन् २०२० मा २० लाख पर्यटक भित्र्याउन ग्रिस पर्यटन मेलामा हुने सहभागिताले सहयोग पुग्नेछ’, उनले भने ।
मेलामा नेपालबाट आनन्द एडभेन्चर ट्रेक प्रालि, अपोइटमेन्ट नेपाल इन्टरनेशनल प्रालि, कोलम्वस ट्राभल्स एण्ड टुर्स प्रालि, कोइली टुर्स प्रालि, मकालु एडभेन्चर ट्राभल्स एण्ड टुर्स प्रालि, एमडी एडभेन्चर टुर्स एण्ड ट्राभल्स प्रालि, मिसन नेपाल होलिडेज, सयपत्री ट्राभल्स नेपाल प्रालि, स्वर्गद्धारी ट्राभल्स एण्ड टुर्स प्रालि र अन्लिज्ड नेपाल इन्टरनेशनल प्रालिको सहभागिता रहने नाट्टाले जनाएको छ ।
नाट्टाले विगतका वर्षमा पनि विभिन्न देशका पर्यटन मेलामा सहभागिता जनाउँदै आए पनि युरोपमा भने पहिलोपटक सहभागिता जनाउन लागेको महासचिव थापाले बताए । यस्ता मेलाको सहभागिताले नेपालको पर्यटन उद्योगको विकासमा सहयोग पुग्ने नाट्टाले जनाएको छ । रासस
© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.