www.tandavnews.com
Fact ~ In search of truth

परराष्ट्रमन्त्री ज्ञवाली स्वदेश फिर्ता

काठमाडौं ।

परराष्ट्रमन्त्री प्रदीपकुमार ज्ञवाली रुसी महासंघ र गणतन्त्र सर्बियाको औपचारिक भ्रमण पूरा गरी आज स्वदेश फर्केका छन् ।

स्वदेश फर्कने क्रममा आज बिहान उनले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै भ्रमणका क्रममा दुवै देशका समकक्षीसँग भेटवार्ता भएको र सो अवसरमा द्विपक्षीय आपसी हित तथा साझा चासोका विषयमा विचार विमर्श भएको जानकारी दिए ।

सो अवसरमा परराष्ट्रमन्त्री ज्ञवाली नेपालले आगामी चैत २१ र २२ गते आयोजना गर्ने विश्वस्तरको संवाद मञ्च सगरमाथा संवादको पहिलो संस्करणमा ‘जलवायु परिवर्तन, पर्वतीय पर्यावरण र मानव जातिको भविष्य’ शीर्षकमा बौद्धिक बहस हुने जानकारी दिँदै त्यसमा सक्रिय सहभागिताका निम्ति आग्रह गरेका थिए।

रुसका परराष्ट्रमन्त्रीसँगको औपचारिक छलफलमा पर्यटन, कृषि र जलविद्युत क्षेत्रमा रुसको लगानी तथा सहयोगबारे चर्चा भएको र रुस नेपालको विकासमा सहयोग गर्न तयार रहेको बताए ।

राष्ट्रपति विद्यादेवी भण्डारीका तर्फबाट राष्ट्रपति भ्लादिमिर पुटिनलाई नेपाल भ्रमणको निमन्त्रणापत्र हस्तान्तरण गर्नुका साथै प्रधानमन्त्री केपी शर्मा ओलीका तर्फबाट पनि मन्त्री ज्ञवालीले रुसी प्रधानमन्त्रीलाई उपयुक्त समयमा नेपाल भ्रमण गर्न निमन्त्रणापत्र हस्तान्तरण गरेका थिए ।

उनले आफ्ना रुसी समकक्षीलाई पनि नेपाल भ्रमणका निम्ति निम्तो दिएको जानकारी गराए । रुसमा रहँदा परराष्ट्रमन्त्री ज्ञवाली गैरआवासीय नेपाली संघ रुस र नेपाल रुसमैत्री समाजको कार्यक्रममा पनि सहभागी भएका थिए ।

परराष्ट्रमन्त्री ज्ञवाली गत शनिबार रुसी महासंघको राजधानी मस्कोतर्फ प्रस्थान गरेका थिए । उनका साथ परराष्ट्रसचिव शंकरदास वैरागी र परराष्ट्र मन्त्रालयका उच्च अधिकारी सहभागी थिए । रासस

© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

You might also like

Comments are closed.