www.tandavnews.com
Fact ~ In search of truth

छुवाछूत समाजको विडम्वना हो : मुख्यमन्त्री गुरुङ

कास्की ।

गण्डकी प्रदेशका मुख्यमन्त्री पृथ्वीसुब्बा गुरुङले मानव–मानवबीचमा जातका आधारमा भेदभाव तथा छुवाछूतजन्य व्यवहार र गतिविधि देखिनु विडम्वनापूर्ण रहेको बताएका छन् । जातीय भेदभाव तथा छुवाछूत उन्मूलन राष्ट्रिय दिवसको अवसरमा आज एक सन्देश प्रकाशित गर्दै उनले समाजमा अहिले पनि सामन्तवादको अवशेषका रूपमा छुवाछूतजन्य व्यवहार कायम रहेको र यस्तो कुरा रत्तिभर पनि सह्य नहुने स्पष्ट पारे ।

संवैधानिक र कानूनीरूपमा कुनै पनि प्रकारको छुवाछूत वा भेदभाव गर्न नपाइने एवं सबै प्रकारका छुवाछूत तथा भेदभावजन्य कार्य गम्भीर सामाजिक अपराधका रूपमा दण्डनीय हुने स्पष्ट व्यवस्था रहेको मुख्यमन्त्रीले स्पष्ट पारेका छन् । छुवाछूत नेपालको संविधान, कानून र सामाजिक न्यायसहितको ‘समृद्ध नेपाल : सुखी नेपाली’को राष्ट्रिय आकाङ्क्षालाई व्यवहारमा सार्थक तुल्याउने हाम्रो सामूहिक सङ्कल्पका अगाडि खडा भएको साझा चुनौती पनि हो र यसको हामी सामूहिकरूपमा नै सामना गर्नुपर्दछ भनेका छन् ।

Lama collectio News Middle

सन्देशमा मुख्यमन्त्री गुरुङले गण्डकी प्रदेशको बागलुङमा जन्मनुभएका नेपालको सङ्गठित दलित मुक्ति आन्दोलनका संस्थापक भगत सर्वजीत विश्वकर्मालगायत सम्पूर्ण अग्रजहरुप्रति उच्च सम्मान प्रकट गर्दै स्वदेश तथा विदेशमा रहनुभएका सम्पूर्ण दिदीबहिनी तथा दाजुभाइमा सु–स्वास्थ्य, सुख, शान्ति, समृद्धि तथा उत्तरोत्तर प्रगतिको शुभकामना व्यक्त गरेका छन् ।

नेपाली समाजमा विद्यमान सबै प्रकारका अन्याय, विभेद र उत्पीडनको अन्त्य गर्दै मानवीय मूल्य र मान्यता स्थापित भएको सभ्य र समतामूलक समाज निर्माणमा आ–आफ्नो ठाउँबाट अर्थपूर्ण भूमिका निर्वाह गर्न आजको दिनले हामी सबैलाई थप प्रेरणा प्रदान गर्न सकोस् भन्ने कामनासमेत मुख्यमन्त्री गुरुङले गरेका छन् । कोभिड–१९ विरुद्धको लडाइँमा पूर्ण सफलता प्राप्त गर्न र यस विश्व सङ्कटको बेलामा अझ दृढतापूर्वक जुट्न आजको दिनले हामी सबैलाई थप प्रेरणा प्रदान गर्नेछ भन्ने विश्वास मुख्यमन्त्रीको रहेको छ । रासस

© 2020, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

Bernhardt
सम्बन्धित खवर
टिप्पणिहरु
Loading...
Hotpop