संजय रेग्मी,
पर्वत /ताण्डव न्यूज।
नेपाली काँग्रेसका सभापति शेरबहादुर देउवाले अदालतमा विचाराधिन अवस्थामा रहेको मुद्धाको विषयमा कसैले पनि दवाब दिन नहुने बताएका छन् ।
पर्वतका शहीद हरिदत्त तिवारीको १८ औँ स्मृति दिवसको अवसरमा जिल्लाको फलेवास नगरपालिका–३ शंकरपोखरीमा आयोजित सभामा सहभागी हुन आएका उनले संसद् विघटनको मुद्दा अदालतमा रहेको बेलामा कसैले पनि अदालतलाई दबाब दिने काम गर्न नहुने बताउँदै उनले काँग्रेसले कहिल्यै पनि यस्ता खराब काम नगरेको दाबी गरे ।
सर्वोच्च अदालतलाई सदनले दबाब दिने भए सर्वोच्च अदालत किन चाहियो? भन्ने प्रश्न गर्दै देउवाले अहिलेको अवस्थामा अदालतले बिचार पु¥याउने भएकोले अदालतलाई धम्क्याउने काम गर्न नहुने उल्लेख गरे । ‘सर्वोच्च अदालतलाई सदनले दबाब दिने भए सर्वोच्च अदालतको के काम? काँग्रेसले कहिल्यै पनि अदालतलाई प्रेसर दिँदैन ।’ उनी भन्छन्, ‘संविधानको व्याख्या गर्ने अदालतले हो । देशमा विज्ञ र वकिलहरू छन्, उनीहरूले यो विषयमा बहस गर्ने छन् ।’
प्रधानमन्त्री ओलीले संसद् विघटन गरेपछि भइरहेका आन्दोलनप्रति लक्षित गर्दै उनले अदालतमा विचाराधीन मुद्धामा कसैले पनि दबाब सिर्जना गर्न नहुने बताए । जनता सर्वोच्च अदालत भन्दा पनि शक्तिशाली अदालत भएकोले निर्वाचनबाट जनताको माझमा पुगेर भोट लिएर जितेर आउन कोही पनि डराउन नहुने सभापति देउवाको भनाई छ । ‘एक दिन जनताको माझमा जानै पर्छ ।
जनताको भोट लिएर आउनपर्छ । त्यसका लागि चुनावसँग डराउने अवस्था त हुँदै हुँदैन नि । जनताको भोट पाउनु भनेको जनताको साथ पाउनु हो ।’ उनले भने, ‘अब काँग्रेसीहरू पनि जनताको घर घरमा पुगेर दुःख सुखमा साथ दिएर चुनावको तयारीमा पनि होमिनुपर्छ ।’
सभापति देउवाले आउँदो वैशाखका लागि तोकिएको निर्वाचन नभए प्रधानमन्त्री ओलीलाई देशमा बस्नै नसक्ने गरी धक्का दिने चेतावनी दिएका छन् । ‘पहिले ओलीलाई भोट दिएर जिताउने अहिले बदमास रहेछ भन्न पाइन्छ ? अहिले बदमास भन्ने भए त्यतीबेला भोट किन दिएको छ ?’ सभापति देउवाले भने, ‘वैशाखमा चुनाव गराउन नसके ओलीलाई यो देशमा बस्नै नसक्ने गरी काँग्रेसले धक्का दिन्छ ।’
पार्टीभित्रको विवादको विषयमा बोल्दै सभापति देउवाले आफू सभापति भएकोले पार्टीभित्रको विवाद मिलाउनु नै आप्mनो कर्तव्य भएको बताए । विगतमा कृष्णप्रसाद भट्टराईले पार्टी छोडेको जस्तो अब कसैले पनि काँग्रेस छोडेर हिँड्नुपर्ने अवस्था आउन नदिने उनको भनाई छ ।
‘म सभापतिका हैसियतले पार्टीभित्रको विवाद मिलाउन जुनसुकै बेलामा पनि प्रयासरत हुन्छु । विवाद मिलाउने मेरो कर्तव्य हो । सभापति भएपछि म आफै पार्टी बिगार्न हिँडुँला र ?’ देउवाले भने, ‘कृष्णप्रसाद भट्टराईले जसरी पार्टी छोडेर हिँड्नुपर्ने अवस्था अब काँग्रेसमा आउँदैन ।’
कार्यक्रमलाई सम्बोधन गर्दै केन्द्रीय सदस्य तथा स्थानीय तह सङ्गठन विभागका प्रमुख अर्जुनप्रसाद जोशीले नेपाली जनताले वर्तमान सरकारको कामलाई भोगिसकेकोले अब देशमा काँग्रेसकै सरकार आवश्यक रहेको अनुभव गरेको बताए । तर विगतमा जस्तो काँग्रेसको ठाउँमा अब सुधारिएको काँग्रेस बनेर जनताको माझमा जानुपर्ने उनको भनाई छ ।
शहीद हरिदत्त तिवारीलाई तत्कालीन माओवादीले २०६० सालमा हत्या गरेका थिए । त्यसपछिको वर्षबाट शहीद तिवारीको सम्झनामा हरेक वर्ष विभिन्न कार्यक्रमहरू हुँदै आएका छन् ।
© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.