कञ्चनपुर,
ताण्डव न्यूज ।
सुदूरपश्चिम प्रदेशका विभिन्न जिल्लामा भारतबाट फर्केकाहरुमा कोरोना भाइरसको संक्रमण देखिन थालेपछि उच्च सतर्कता अपनाउन थालिएको छ । पछिल्लो २ दिनमा कैलाली र कञ्चनपुरका गरी तीन जना भारतबाट फर्केकाहरुमा कोरोना भाइरसको संक्रमण देखिएको छ ।
भारतमा कोरोना संक्रमणको दर बढेसँगै पश्चिमी जिल्लाहरुमा कडाई गरिएको हो । सुदूरपश्चिम प्रदेका विभिन्न भारतसँग जोडिएका नाकामा आउजाउमा कडाई गर्नुका साथै शंकास्पद व्यक्तिको आरडिटी परीक्षण गर्ने र क्वारेन्टाइनमा राख्ने व्यवस्था पनि सुरु भएको छ । यसै क्रममा कञ्चनपुरमा मध्यरातिदेखि विभिन्न गतिविधिमा रोक लगाइएको छ ।
गएराति १२ बजेदेखि अर्को सूचना जारी नभएसम्मका लागि विभिन्न गतिविधिमा रोक लगाइएको कञ्चनपुरका प्रमुख जिल्ला अधिकारी राम कुमार महतोले बताए । उनले बिहान ४ बजेदेखि बेलुका १० बजेसम्म मात्र जनस्वास्थ्यका मापदण्डको पूर्ण पालना गरी आवश्यक काममा निस्कनका लागि सबैलाई आग्रह गरिएको पनि बताए ।
मंगलबार साँझ एक विज्ञप्ति जारी गर्दै जिल्ला प्रसाशन कार्यालय कञ्चनपुरले धार्मिक तथा सामाजिक स्थलमा भौतिक दुरी पालना गर्ने, अत्यावश्यक बाहेकका व्यापार, व्यवसाय, उद्योग, कलकारखाना, यातायात लगायतका सेवा एवं मानिसहरुको आवागमन बिहान ४ बजेदेखि बेलुका १० बजेसम्म मात्रै गर्ने, आइरहेको होली पर्व, मेला महोत्सव, जात्रा, भिडभाड हुने गतिविधि नगर्न सबैलाई आग्रह गरेको छ ।
यस्तै सरकारले तोकेका व्यवस्थाको उल्लंघन गरेमा सङ्क्रामक रोग ऐन, २०२० बमोजिम कारबाही गर्ने पनि विज्ञप्तिमा उल्लेख गरिएको छ ।
© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.