www.tandavnews.com
Fact ~ In search of truth

फरक प्रदेशका सवारीसाधनको कर संकलन र नवीकरण रोकिँदा समस्या

यातायात व्यवस्था कार्यालय नवलपरासी (बर्दघाट सुस्तापूर्व) नवलपुरमा फरक प्रदेशका सवारी साधनको कर संकलन र नवीकरण रोकिँदा सेवाग्राहीलाई समस्या भएको छ । भौतिक पूर्वाधार, सहरी विकास तथा यातायात व्यवस्था मन्त्रालय गण्डकी प्रदेशबाट फरक प्रदेशका सवारीसाधनको कर संकलन र नवीकरणसम्बन्धी परिपत्र नआएपछि यातायात व्यवस्था कार्यालयले कर संकलन तथा नवीकरण कार्य रोकेको छ ।

कर संकलन र नवीकरणको काम रोकिएपछि यस क्षेत्रका सेवाग्राही भने समस्यामा परेका छन् । मन्त्रालयबाट फरक प्रदेशका सवारीको कर संकलन र नवीकरणका लागि परिपत्र नआएकाले कावासोतीस्थित कार्यालयबाट गण्डकी प्रदेशबाहेकका अन्य प्रदेशमा दर्ता भएका सवारी साधनको कर तथा नवीकरण कार्य रोकिएको यातायात व्यवस्था कार्यालयका प्रमुख ज्ञानप्रसाद भुसालले बताए ।

यस कार्यालयबाट अघिल्ला वर्षमा सवारी धनीको ठेगाना गण्डकी प्रदेश रहेकाहरूका सवारीसाधन दर्ता अन्य प्रदेशमा भएको भएपनि कर संकलन र नवीकरण हुँदै आएको थियो । अहिले यस आर्थिक वर्षका लागि मन्त्रालयले कर संकलन र नवीकरण यथास्थितिमा गर्न भनी कुनै पत्राचार नगरेकाले आफूहरूले फरक प्रदेशमा दर्ता भएका सवारीसाधनको कर संकलन र नवीकरण रोकेको कार्यालय प्रमुख भुसालले जानकारी दिएका छन् ।

Batas

‘हामीलाई प्रत्येक वर्ष कर संकलनका लागि मन्त्रालयबाट पत्र आउँथ्यो, सोही आधारमा सवारी धनीको ठेगाना गण्डकी प्रदेशमा भएका तर सवारीसाधन दर्ता अन्य प्रदेशमा भएपनि नवीकरण गर्ने काम गथ्र्यौं’, उनले भने, ‘अहिले यस्तो परिपत्र आएको छैन, यसले गर्दा अन्य प्रदेशमा दर्ता भएका सवारी साधनको कर संकलन र नवीकरण कार्य रोकेका छौं ।’ अहिले गण्डकी प्रदेशबाट दर्ता भएका सवारीसाधनको मात्रै कर संकलन र नवीकरण गरिएको उनले बताए ।

फरक प्रदेशका सवारीसाधनको कर संकलन र नवीकरण रोकिँदा सेवाग्राही भने समस्यामा परेको गुनासो गरेका छन् । यस क्षेत्रमा अधिकांश बागमती, लुम्बिनी, नारायणीबाट दर्ता भएका सवारीसाधन सञ्चालनमा छन् । ती स्थानबाट सवारी दर्ता भएका सेवाग्राही अहिले अन्यत्र कर बुझाउन जानुपर्दा समस्या सिर्जना भएको उनीहरूको भनाइ छ । नवलपुरको कार्यालयले आफ्नो सवारीसाधन नवीकरण नगर्दा अब अन्यत्र जानुपर्दा समस्या हुने स्थानीयबासी निरोज सिञ्जाली बताउँछन् ।

प्रमुख भुसालले भने आफूहरूले यस विषयमा कर संकलन र नवीकरणका लागि अनुमति दिन पत्राचार गरिसकेको बताए । ‘हामीले सेवाग्राहीका समस्या बुझेका छौं, पत्राचारसमेत सम्बन्धित निकायमा गरेका छौं’, कार्यालय प्रमुख भुसालले भने, ‘सायद चाँडै यस विषयमा निकास आउने छ, अघिल्ला वर्षहरूमा जसरी कर संकलन र नवीकरणका लागि निरन्तरता दिनु भने हामी तत्काल कार्य गर्छौं ।’रासस

© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

You might also like

Comments are closed.