www.tandavnews.com
Fact ~ In search of truth

घर निर्माणका लागि रकम माग्दै मुक्तहलिया परिवार

कञ्चनपुर

पुनः स्थापना कार्यक्रम अन्तर्गत जग्गा प्राप्त गरेका मुक्तहलिया परिवार घर निर्माणका लागि रकम माग गर्दै शुक्लाफाँटा नगरपालिका धाउँदै आएका छन् । पटकपटक नगरपालिका कार्यालय पुगे पनि मुक्तहलिया परिवारले घर निर्माणका लागि आश्वासन बाहेक रकम पाउन सकेका छैनन् ।

भूमि व्यवस्था, कृषि, सहकारी तथा गरिबी निवारण मन्त्रालयले मुक्तहलिया पुनः स्थापन कार्यक्रम अन्तर्गतको वित्तीय हस्तान्तरणसहितको अधिकार स्थानीय तहलाई दिएको छ । आव २०७७/७८ मा मुक्तहलिया पुनः स्थापनका लागि नगरपालिकामा रु १ करोड ५० लाख बजेट प्राप्त भएकोमा ‘क’ वर्गका मुक्तहलियाका २५ परिवारका लागि जग्गा खरिद गरी जग्गा धनी पूर्जा हस्तान्तरण गरिएको छ ।

Batas

जग्गा खरिदका लागि नगरपालिकाले रु ५४ लाख रकम खर्च गरेको छ । बाँकी रकम घर निर्माणका लागि मुक्तहलिया परिवारलाई उपलब्ध गराउनुपर्नेमा गराइएको छैन । जग्गा खरिदका लागि रु २ लाख र घर निर्माणका लागि रु २ लाख ५० हजार रकम मुक्तहलिया परिवारलाई उपलब्ध गराउनुपर्ने प्रावधान रहेको छ ।

मुक्तहलिया परिवारलाई ७ धुरका दरले जग्गा खरिद गरी जग्गाधनी पूर्जा दिइएको छ । ‘जग्गा छ, जग्गा धनी पूर्जा पाएका छौं’ पृते पार्कीले भने, ‘घर निर्माणका लागि रकम नपाउँदा बिचल्लीमा परेका छौं । नगरपालिकाले आश्वासन मात्रै दिन्छ । घर निर्माणका लागि पहिलो किस्ताको रकमसमेत दिएको छैन ।पटकपटक नगरपालिका कार्यायमै पुगेर घर निर्माणको रकम माग्दै आएका छौँ, पाएका छैनौं’ कमला लावडले भने । सार्वजनिक जग्गामा त्रिपालको झोपडीमा बस्दा बस्दा थाकिसकेको र अब पाएको जग्गा धनी पूर्जा नगरपालिकालाईनै फिर्ता गर्ने अवस्थामा पुगेको उनको भनाइ थियो ।

मुक्तहलिया परिवार १ हप्ताभित्रै रकम निकासा नभए बालबालिकासहित नगरपालिका कार्यालयमै आएर बस्नेसमेत बताउँछन् । ‘वर्षातका बेला चुहिने प्लाष्टिकको झुपडीमा बस्नुपर्ने अवस्था छ । निकै कष्टकर अवस्थामा जीवन बिताउँदै आएका छौं । कोरोनाका कारण गर्दै आएको मजदूरीसमेत नपाइदा साँझ बिहानको खानाखर्च जुटाउनै मुस्किल छ’ गणेश दमाइँले भने, ‘नगरपालिकाले घर निर्माणको रकम निकासासँगै रोजगारीको समेत ग्यारेण्टी गर्नुपर्छ ।’

नगर प्रमुख दिलबहादुर ऐर मुक्तहलिया परिवारलाई चाँडै घर निर्माणको पहिलो किस्ताबापतको रकम उपलब्ध गराउनका लागि काम अगाडि बढेको बताउछन् । ‘घरबिहीन अवस्थामा कसैलाई पनि राख्दैनौं’, उनले भने, ‘छिटोभन्दा छिटो रकम निकासाका लागि काम गरिरहेका छौं ।’ राष्ट्रिय हलियामुक्ति समाज कञ्चनपुरका अध्यक्ष सिबी लुहार मुक्तहलिया परिवारको जग्गा खरिद गरिएको १ वर्ष बिते पनि मन्त्रालयबाट निकासा भएको घर निर्माणबापतको रकम नपाउँदा अवस्था विजोग रहेको बताउँछन् । तत्काल नगरपालिकाले मुक्तहलियाको घर निर्माणबापतको रकम उपलब्ध गराउनुपर्ने उनको भनाइ छ ।

रासस

© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

You might also like

Comments are closed.