जनकपुर, राजु विश्वकर्मा
धार्मिक आस्थासँग जोडिएको ऐतिहासिक सीताराम विवाह पञ्चमी महोत्सव भव्यपूर्वक मनाउन तयारीमा जुटेका जनकपुरवासी बढ्दो फोहोरको डंगुरले चिन्तित बनेका छन् । जनकपुर उपमहानगरपालिकाका कर्मचारीको आन्दोलनका कारण विगत एक सातादेखि फोहोर नउठ्दा नगरक्षेत्रका सडकमा फोहोरको डंगुर बढेर दुर्गन्ध फैलिन थालेकाले जनकपुरवासी चिन्तित बनेका हुन् ।
यहाँका मुख्य सडक तथा गल्लीसँगै धार्मिकस्थलमा समेत फोहोरको डंगुर लागेपछि महामारी फैलिने त्राससमेत बढेको स्थानीयवासीले बताए । फोहोर थुप्रिँदै गएपछि यहाँका सडक सुंगुर खेल्ने र रमाउनेस्थलका रुपमा परिणत हुन थालेको जनकपुर उपमहानगरपालिका– २ कदम चोकका श्याम साहले चिन्ता व्यक्त गरे ।
“उपमहानगरपालिकाका जनप्रतिनिधि र कर्मचारीबीचको विवादले विगत एक सातादेखि नगरक्षेत्रको फोहोर उठ्न सकेको छैन”, उनले भने, “जनकपुरका सबै सडक र गल्लीमा फोहर थुप्रिएर दुर्गन्ध फैलिन थालेको छ भने लामखुट्टेको प्रकोप पनि बढ्दै गएको छ । यस्तै रहे जनकपुरमा हैजा नफैलिएला भन्न सकिन्न ।”
भगवान् राम सीताको विवाहसँग जोडिएको विवाह पञ्चमी महोत्सव यस वर्ष पनि जनकपुरमा साताव्यापीरुपमा मनाउने तयारी गरिएको छ । मङ्सिर १७ देखि २३ गतेसम्म विविध कार्यक्रम गरी धुमधामका साथ मनाउने तयारी भइरहेका बेला जनकपुरका सडकमा थुप्रिएको फोहरले सबैलाई निराश बनाएको प्रदेशसभा सदस्य रामअशिष यादवले बताए ।
सिंगो हिन्दू समुदायको धार्मिक आस्थासँग जोडिएको विवाह पञ्चमी महोत्सव सुरु हुन एक साताभन्दा पनि कम समय बाँकी रहँदासमेत उपमहानगरपालिकाले फोहोर उठाउन चासो नदिँदा जनकपुरवासीमा चिन्ता बढेको उनको भनाइ थियो । “जनकपुर उपमहानगरपालिकाले फोहोर संकलनमा गम्भीर नभएकाले नगरक्षेत्र दुर्गन्धित भएको हो”, प्रदेशसभा सदस्य यादवले भने, “जनप्रतिनिधि र कर्मचारीको विवादका कारण सिंगो जनकपुर नै फोहोर थुप्रेर कुरुप बन्न पुगेको छ । यो कदापि उचित होइन तसर्थ छिटोभन्दा छिटो फोहर उठाएर नगर क्षेत्रलाई सफा बनाउनुपर्छ ।”
“विवाह पञ्चमीका समयमा नेपाल तथा छिमेकी मुलुक भारतबाट लाखौंको संख्यामा श्रद्धालु भक्तजन जनकपुर आउने गर्छन्”, उनले बताए, “यस्तै अवस्था रहे जनकपुर महामारीको चपेटामा पर्ने र यहाँको पहिचान नै संकटमा पर्नसक्ने खतरा छ ।”
त्यसैले आन्तरिक घरझगडाका कारण सिंगो जनकपुरवासीलाई फोहोरको चपेटामा पार्न नहुने प्रदेशसभा सदस्य यादवको भनाइ थियो । नगरक्षेत्रको चारैतिरका सडक, गल्ली र धार्मिकस्थलमा फोहरको डंगुर बढ्दै गएकाले नजिकिँदै गरेकोे विवाह पञ्चमी महोत्सवमै असर पार्ने चिन्ता बढेको जानकी मन्दिरका महन्थ रामरोशन दास श्रीवैष्णवले बताए ।
“हामीले विवाह पञ्चमीका दिन भारतको अयोध्याबाट आउने जन्तीको स्वागत गर्नेदेखि श्रद्धालुको सुविधाका लागि पण्डाल तथा स्वागतद्वार निर्माणलगायत तयारीमा जुटेका छौँ”, उनले भने, “तर नगरक्षेत्रमा बढ्दो फोहोरले गर्दा समस्यामा परेका छौँ ।” नगरक्षेत्रको फोहोर उठाएर विवाह पञ्चमीमा आउने श्रद्धालुका लागि सरसफाइ र खानेपानीको व्यवस्था मिलाइदिन उपनगरप्रमुखसँग आग्रह गरे पनि कुनै प्रगति नभएको उनको गुनासो थियो ।
वडा नं ४ का वडाध्यक्ष सुदर्शन सिंह र वडा सदस्य पंकज मण्डलले कुटपिट गरेको भन्दै कर्मचारी विगत एक सातादेखि सरसफाइलगायत सम्पूर्ण कामकाज ठप्प पारेर आन्दोलनमा उत्रेका छन् । गत मंगलबार वडा ३, ४ र ७ का वडाध्यक्ष तथा वडा सदस्यले नगरको सरसफाइका विषयलाई लिएर उपमहानगरपालिका कार्यालयमा नाराबाजी गर्नाका साथै उपमहानगरप्रमुख लालकिशोर साहको कार्यकक्षमा तालाबन्दीसमेत गरेका थिए । जनप्रतिनिधि र कर्मचारीबीचको विवाद साता बित्न लाग्दासमेत समाधान गर्नेतर्फ कुनै पहल नभएको स्थानीयवासीको गुनासो थियो ।
एकातिर विवादकै कारण लामो समयदेखि फोहोर उठ्न नसक्दा जनकपुर दुर्गन्धित बनेको छ भने अर्कोतिर दैनिकरुपमा उत्पादन हुने फोहोरको व्यवस्थापन कहाँ गर्ने भन्ने चुनौती थपिएको छ । बढ्दो शहरीकरण र जनसंख्याका कारण नगर क्षेत्रमा दैनिक फोहोर बढ्दै गएको छ । “प्रदेश २ को अस्थायी राजधानी हुनुपूर्व अर्थात् केही वर्षअघिसम्म उपमहानगरपालिका क्षेत्रमा दैनिक छ÷सात मेट्रिकमात्र फोहोर उत्पादन हुन्थ्यो”, उपमहानगरपालिका निमित्त प्रमुख प्रशासकीय अधिकृत मेघीलाल यादवले भने, “अहिले जनकपुरमा दैनिक १० मेट्रिकटन फोहर उत्पादन भइरहेको छ तर फोहोर फाल्ने डम्पिङसाइट बनाउन सकिएको छैन । जसका कारण फोहोर फ्याल्नै गाह्रो भइरहेको छ । ”
नगरक्षेत्रमा फोहर उठन नसकेको भन्दै चौतर्फी गुनासो उठ्न थालेपछि आफूले फोहोर व्यवस्था गर्न पहल गरे पनि उपमहानगरपालिकाबाट सहयोग नपाएकाले सफल नभएको धनुषाका प्रमुख जिल्ला अधिकारी बन्धुप्रसाद बास्तोलाले बताए ।
“फोहोरले नगर नै दुर्गन्धित भयो भनेर धेरैतिरबाट गुनासो आएपछि म आफैँले नगर प्रमुखलाई फोन गरेर विवाद समाधान गरी फोहोर व्यवस्थापन गर्न आग्रह गरें तर नगरप्रमुखज्यूले म किन वडाध्यक्षसँग कुरा गर्नु भन्दै पन्छिनुभयो”, प्रजिअ बास्तोलाले भने, “त्यसपछि सुरक्षाकर्मी र अन्य सरोकारवाला निकायको सहयोगमा फोहर उठाउने प्रयास गरेँ तर नगरक्षेत्रमा फोहोर फ्याल्ने डम्पिङसाइट नभएकाले समस्या भएको छ ।” फोहोरले ठूलो समस्या निम्त्याउन सक्ने भएकाले समयमै यसको व्यवस्थापन गर्नेतर्फ उपमहानगरपालिका चनाखो हुनुपर्ने र त्यसका लागि सरोकारवालाले पनि पहल गर्नुपर्ने उनको भनाइ थियो ।
रासस
© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.