अर्जुन गाहा (सुशान्त)
पोखरा, ताण्डव न्यूज
पोखरा महानगरपालिका २० आटीघरमा निर्माणाधिन हाई अल्टिच्युड मैदानको निर्माण कार्य अन्तिमचरणमा पुगेसँगै महानगरले दोस्रोचरणको ठेक्का प्रक्रियाको तयारी थालेको छ ।
पोखरा महानगरपालिकाकै लगानीमा निर्माणाधिन मैदानको पहिलोचरणको काम अन्तिमचरणमा पुगेको वडा २० का अध्यक्ष सिम गुरुङले बताए । उनले पहिलोचरणको काम सकिए लगत्तै दोस्रो चरणको निर्माणका लागि ठेक्का प्रक्रिया जाने जानकारी दिए । अध्यक्ष गुरुङले गत वर्ष विनियोजित बजेटको काम अन्तिमचरणमा पुगको बताए ।
उनका अनुसार यतिबेला मैदान सम्याउने (लेभलिङ) काम भइरहेको छ । ‘ठेकेदारले भने अनुसार अबको ५ दिनमा पहिलोचरणको काम सकिन्छ, अध्यक्ष गुरुङले भने, ‘त्यस लगत्तै दोस्रोचरणका लागि टेण्डर प्रक्रियामा गैहाल्छौ ।’ गुरुङका अनुसार दोस्रोचरणका लागि ४० लाख महानरले रेड बुकमै समावेश गरेको छ ।
महानगरको अनुमानित १६ करोडको गुरुयोजना (डिपीआर) अनुसार नै निर्माणका कामहरु भइरहेको बताए । गुरुङले उक्त प्राजेक्ट पञ्चवर्षिय योजना अन्तर्गत रहेको बताउँदै सो स्थानमा अन्र्तराष्ट्रिय मापडण्डअनुसारको फुटबल मैदान, चमेना गृह, चेन्जिङ रुमलगायतका भौतिक संरचना निर्माण गरिने बताए ।
खेलकुदको माध्यममबाट पर्यटनको हब बनाउँछौ : अध्यक्ष गुरुङ
अध्यक्ष गुरुङले सो क्षेत्रमा निर्माणधिन मैदान सम्पन्न भएसँगै पर्यटकीय गतिविधि थप मौलाउने बताए ।
उनले उक्त मैदान अन्नपूर्ण र माछापुच्छ्रे हिमालको काखमा रहेको बताउँदै प्राकृतिक सौन्दर्यताले पर्यटकलाई आकर्षित गर्ने बताए । ‘त्यो ठाउँ १७ सय मिटर उचाईमा छ । त्यहाँ ग्राउण्ड नजिक कालिज, मृग, झारल जस्ता जंगली पशुपंछीहरु पनि देख्न पाईन्छ, उनले भने, ‘यतिमात्र नभई हिमालको काखमै खेल खेल्न पाईन्छ । यसले गर्दा खेलकुदसँगै पर्यटनको प्रचुर सम्भावना छ त्यसैले खेलकुदको माध्ययमबाट हामीले वडा २० लाई पर्यटकीय हब बनाउने लक्ष्य राखेका छौ ।’
© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.