मनाङ ।
हिमाल चढ्न चाहने व्यक्तिका लागि टेवा पुग्ने भएकाले मनाङ ङिस्याङ गा–४ हुम्डेमा रहेको ‘हुम्डे झरना’मा लेबल १ अन्तर्गतको ‘आइस क्लाइम्बिङ’ प्रशिक्षण दिइएको छ ।
हिमपातको समयमा पर्वतारोहण गर्ने पर्वतारोहीका लागि सहज हुने भएकाले प्रशिक्षण दिइएको मनाङ ङिस्याङ गाउँपालिकाका अध्यक्ष कान्छा घलेले जानकारी दिए । उनका अनुसार सो प्रशिक्षणमा पाँच प्रशिक्षार्थीको सहभागिता रहेको थियो । उनीहरुलाई दुई जना प्रशिक्षकले प्रशिक्षण दिएको अध्यक्ष घलेले बताए । “पाँच जनालाई नौ दिनसम्म तालिम प्रदान गरिएको थियो । प्रशिक्षकहरूले प्रशिक्षणको अनुभव आदानप्रदानसमेत गर्नुभएको थियो”, उनले भने ।
नेपाल पर्वतारोहण प्रशिक्षण सङ्घद्वारा आयोजित प्रशिक्षणमा नेपाल नेशनल माउण्टेन गाइड एशोसिएशनको सहयोग रहेको छ । “आइस क्लाइम्बिङ प्रशिक्षणले पनि हिउँदमा पर्यटक तान्न टेवा पु¥याउनेछ । यसलाई आगामी दिनमा पनि निरन्तरता दिने प्रयास गर्नेछौँ”, अध्यक्ष घलेले भने ।
तालिममा प्रशिक्षकले आफ्नो अनुभव बाँडेको र तालिम एकदमै सफल भएको तासी शेर्पाले बताए । “तालिमले नयाँ अनुभव सँगाल्न र रोमाञ्चकसमेत बनाएको छ । आगामी दिनमा पनि यसलाई निरन्तरता दिएर एउटा साहसिक खेलका रूपमा विकास गर्न सके अझ महत्वपूर्ण हुनेछ”, उनले भने ।
यहाँ सशस्त्र प्रहरीले हाइ अल्टिच्युड र पर्वतारोहणका क्रममा हुनसक्ने जोखिममा सहयोग गर्नका लागि प्रशिक्षण केन्द्र पनि रहेको छ । मनाङको हुम्डेमा नेपाल पर्वतारोहण संघद्वारा विसं २०३७ मा मनाङ माउन्टेन रिङ स्कूल स्थापना गरिएको छ ।
रासस
© 2022, Tandav News. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.