काठमाडौँको बबरमहलस्थित कार्की ब्याङ्क्वेटमा जारी केन्द्रीय कमिटी बैठकमा राजनीतिक प्रतिवेदन पेश गर्दै अध्यक्ष ओलीले आगामी निर्वाचन राजनीतिक स्थायित्वका पक्षधर र अस्थिरताका संवाहकहरू बिचको लडाइका रुपमा हेर्नुपर्ने बताए।

उनले संवैधानिक कर्तव्य र स्वेच्छाले नभई जनदबाबका कारण चुनावको मिति घोषणा गर्न बाध्य भएको दाबी गर्दै निर्वाचन तोकिएकै मितिमा, शान्तिपूर्ण, धाँधलीरहित र निष्पक्ष ढङ्गले सम्पन्न गर्ने कुरा सुनिश्चित गर्न चनाखो हुनुपर्ने धारणा राखे ।

भोलिसम्म चल्ने जारी केन्द्रीय कमिटी बैठकको मुख्य एजेन्डा वैशाख ३० को स्थानीय तहको निर्वाचनमा केन्द्रित रहेको छ । बैठकमा अध्यक्ष ओलीले राजनीतिक तथा समसामयिक प्रतिवेदन पेश गरेका थिए। भने सात वटै प्रदेशका अध्यक्षहरूले रिपोर्टिङ गरेका छन् । बैठकमा महासचिव शङ्कर पोखरेलको चुनावी घोषणापत्र, उम्मेदवार चयनका मापदण्डलगायतका विषय मुख्य एजेन्डाका रुपमा रहेका छन् ।

यस्तै बैठकमा पार्टीका विभागलाई पूर्णता दिने, निर्वाचनमा पार्टी नेतृत्वको भूमिका, सचिवालय र पोलिटब्यूरो कमिटी बैठकको निर्णय अनुमोदन लगायत प्रस्तावमाथि पनि छलफल हुने बताइएको छ ।
रासस