सुदूरपश्चिम।
आसन्न स्थानीय तहको निर्वाचनका लागि सुदूरपश्चिम प्रदेशमा १६ लाख ३२ हजार १५० मतदाता कायम भएका छन् ।
विसं २०७४ मा भएको प्रतिनिधिसभा र प्रदेशसभाको निर्वाचनमा यो प्रदेशका नौ जिल्लामा १४ लाख ३५ हजार ६७४ मतदाता रहेका थिए । विगत पाँच वर्षमा एक लाख ९६ हजार ४७६ मतदाता थपिएका हुन् ।
प्रदेश निर्वाचन कार्यालय कैलालीका अनुसार आसन्न स्थानीय तहको निर्वाचनका लागि सबैभन्दा बढी कैलालीमा कूल पाँच लाख २५ हजार १२५ मतदाता पुगेका छन् । तीमध्ये दुई लाख ५६ हजार १०४ पुरुष र दुई लाख ६९ हजार १० महिला रहेका छन् ।
सबैभन्दा कम बाजुरामा कूल ८२ हजार ६९० मतदाता छन् । तीमध्ये ४२ हजार १५१ पुरुष र ४० हजार ५३७ महिला रहेका छन् । त्यस्तै दार्चुलामा ४५ हजार १११ पुरुष र ४३ हजार १७४ महिला गरी कूल ८८ हजार २८५, बैतडीमा ७३ हजार ८८३ पुरुष र ७४ हजार ७२१ महिला गरी कूल एक लाख ४८ हजार ६०६, र डडेल्धुरामा ४४ हजार ६६४ पुरुष र ४५ हजार ४५५ महिला गरी कूल ९० हजार ११९ मतदाता रहेका छन् ।
यसैगरी कञ्चनपुरमा दुई लाख ९५ हजार ३५४ मतदाता छन् तीमध्ये एक लाख ४३ हजार २४१ पुरुष र एक लाख ५२ हजार ११२ महिला रहेका छन् । डोटीमा ५८ हजार २८२ पुरुष र ६५ हजार २७२ महिला गरी कूल एक लाख २३ हजार ५५४, अछाममा ७५ हजार ८३७ पुरुष र ८० हजार ४४१ महिला गरी कूल एक लाख ५६ हजार २८० र बझाङमा ६१ हजार ३८९ पुरुष र ६० हजार ७४८ महिला गरी कूल एक लाख २२ हजार १३७ मतादाता रहेको बताइएको छ ।
तेस्रो लिङ्गी मतदातामध्ये कैलालीमा ११ तथा अछाम, बाजुरा र बैतडीमा दुई/दुई र कञ्चनपुरमा एकजना रहेको छ ।
मतदान स्थल र केन्द्र
आसन्न स्थानीय तहको निर्वाचन प्रयोजनका लागि प्रदेशको कैलालीमा २३६ मतदानस्थलमा ६१९ मतदान केन्द्र कायम गरिएको छ । यस्तै कञ्चनपुरमा १३२ मतदानस्थल र ३४१ मतदान केन्द्र, डडेल्धुरमा ८० मतदानस्थलमा १२६ मतदान केन्द्र र बैतडीका १२९ मतदानस्थलमा २०५ मतदान केन्द्र कायम गरिएको छ ।
दार्चुलामा कायम भएका ११० मतदानस्थलमा १३९ मतदान केन्द्र, डोटीका ११५ मतदानस्थलमा १७१ मतदान केन्द्र, बझाङका १३३ मतदानस्थलमा १८३ मतदान केन्द्र, अछामका १३० मतदानस्थलमा २०७ केन्द्र र सबैभन्दा कम मतदाता रहेको बाजुरामा कायम भएका ७० मतदानस्थलमा ११२ मतदान केन्द्रको व्यवस्था गरिएको छ । प्रदेशमा प्रतिनिधिसभाका १६, प्रदेशसभाका ३२ निर्वाचन क्षेत्र रहेका छन् । ८८ स्थानीय तह रहेको यो प्रदेशमा एक उपमहानगरपालिका (धनगढी), ३३ नगरपालिका र ५४ गाउँपालिका रहेका छन् । यी पालिकामा जम्मा ७३४ वडा छन् ।
जनसङ्ख्याको दृष्टिले तराईका जिल्ला कैलाली र कञ्चनपुर ठूला छन् । प्रतिनिधिसभाका लागि कैलालीमा पाँच र कञ्चनपुरमा तीन निर्वाचन क्षेत्र रहेका छन् । पहाडी जिल्ला अछाममा प्रतिनिधिसभाका दुई निर्वाचन क्षेत्र र अन्य छ जिल्लामा एक÷एक निर्वाचन क्षेत्र कायम छन् । हालैको जनगणनाको प्रारम्भिक तथ्याङ्क अनुसार यो प्रदेशको जनसङ्ख्या २७ लाख ११ हजार २७० पुगेको छ । विसं २०६८ को जनगणनाअनुसार यो प्रदेशको जनसङ्ख्या २५ लाख ५२ हजार ५१७ रहेको थियो ।
स्थानीय निर्वाचनको मिति नजिकिँदै जाँदा निर्वाचन कार्यालयले तयारीको काम तीब्र बनाएको छ ।
© 2022, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.