www.tandavnews.com
Fact ~ In search of truth

म्याग्दीको नारच्याङमा चिस्यान गृह

म्याग्दी।
म्याग्दीको अन्नपूर्ण गाउँपालिका–४ नारच्याङमा फलफूल र तरकारी भण्डारण गर्ने चिस्यानगृह निर्माण भएको छ । प्रधानमन्त्री कृषि आधुनिकीकरण परियोजनाअन्तर्गत सुन्तलाको व्यावसायिक कृषि उत्पादन तथा प्रशोधन केन्द्र (जोन) कार्यक्रमको सहयोगमा न्यू अन्नपूर्ण कृषि तथा पशु मल्टी एग्रोले चिस्यानगृह बनाएको हो ।

कृषि फार्मका सञ्चालक प्रेम गुरुङले १० हजार किलोग्राम तरकारी र फलफूल भण्डारण गरेर राख्न सकिने क्षमताको चिस्यानगृह बनाएको बताए। “यस क्षेत्रका कृषकले उत्पादन गरेका सुन्तला जात फलफूल र तरकारीलाई भण्डारण तथा बजारीकरणका लागि चिस्यानगृह बनाइएको हो”, उनले भने, “बेमौसममा बढी मूल्य पार्न सकिनुका साथै बजार नपाउने समस्या पनि हट्ने अपेक्षा गरेका छौँ ।”

सुन्तलालाई दुई महिना, स्याउलाई पाँचदेखि छ महिना भण्डारण गरेर राख्न सकिने गुरुङले बताए। माघ–फागुनमा नारच्याङ, दाना, भुरुङ, तातोपानी, घार, हिस्तानमा उत्पादन भएको सुन्तला र भदौ–असोजमा मुस्ताङको स्याउ भण्डारण गर्ने योजना छ ।

Batas

चिस्यानगृहको भवनमा फलफूल र तरकारीलाई ताजा बनाइराख्ने अनुकुलित हावापानी बनाउने उपकरण जडान गरिएको छ । बेमौसममा सुन्तला र स्याउ बिक्री गर्दा दोब्बर मूल्य पारेर बढी आम्दानी लिन सकिन्छ । सिजनमा उचित मूल्य नपाउने समस्या पनि चिस्यानगृह सञ्चालन भएपछि हट्ने अपेक्षा गरिएको छ ।

चिस्यानगृह बनाउनका लागि प्रधानमन्त्री कृषि आधुनिकीकरण परियोजनाको बेनीस्थित सुन्तला जोन कार्यालयले गत आर्थिक वर्ष २०७८/७९ मा रु १३ लाख अनुदान उपलब्ध गराएको थियो । कुल रु २३ लाख खर्च भएको चिस्यानगृहको पूर्वाधार र उपकरण खरिदमा सञ्चालकले रु १० लाखभन्दा बढी लगानी गरेको बताएका छन् ।

सुन्तला जोनका कृषि अधिकृत विक्रम बस्यालले नारच्याङमा म्याग्दी जिल्लामै पहिलोपटक आधुनिक चिस्यानगृह निर्माण भएको बताए। उनका अनुसार परियोजनामार्फत पछिल्लो तीन वर्षमा म्याग्दी, बाग्लुङ, पर्वत र मुस्ताङमा फलफूल भण्डारणका लागि सातवटा चिस्यानगृह निर्माण भएका छन् ।

आव २०७९/८० मा चारवटा चिस्यानगृह स्थापना गर्ने लक्ष्य छ । आव २०७६/७७ मा पाँच टन क्षमताको एक, २०७७/७८ मा ४२ टन क्षमताका तीनवटा र २०७८/७९ मा ३० टन क्षमताका तीनवटा चिस्यानगृह स्थापना भएका कृषि अधिकृत बस्यालले बताए।
रासस
–––

© 2022, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

You might also like

Comments are closed.