www.tandavnews.com
Fact ~ In search of truth

हुम्डे विमानस्थलले पाएन निरन्तरता

मनाङ । 

मनाङ जिल्लाको एकमात्र हुम्डे विमानस्थल परीक्षण उडानपछि पुनः सञ्चालन हुन सकेको छैन । विमानस्थल निर्माण भएको सात वर्षपछि समिट एयरलाइन्सले भदौ २७ गते परीक्षण उडान गरेको थियो । सफल उडान भएपछि खुशी भएका मनाङवासी निरन्तर उडान नहँुदा निरास भएका छन् ।

पर्यटक भित्रिने समयमा मनाङमा हवाइ उडान सञ्चालन हुन नसक्दा पर्यटक आउन सकेका छैनन् । विमान सञ्चालन हुन सकेको भए विमानबाट आउने–जानेको सङ्ख्या वृद्धि हुने पर्यटन व्यवसायी विनोद गुरुङले बताए । विमानस्थल सञ्चालन नहँुदा मनाङ आउने पर्यटक वृद्धिमा टेवा पुग्ने भए पनि त्यस्तो हुन नसक्दा समस्या नै रहेको पर्यटन व्यवसायी गुरुङको भनाइ छ । उनका अनुसार कतिपय पर्यटक बिरामी परेर हेली चाटर गर्नु परेको छ ।

Mahanagar add

विमानस्थलमा निरन्तर उडान भर्न सक्ने हो भने मनाङमा आन्तरिक तथा बाह्य पर्यटकको सहज यात्रा र पर्यटक वृद्धि हुने पर्यटन व्यवसायीको भनाइ रहेको छ । गण्डकी प्रदेश पर्यटन मन्त्रालयले मुख्य याममा हप्ताको दुई पटक उडान भर्ने बताउँदै आएपनि सफल हुन सकेको छैन । गण्डकी प्रदेशका पर्यटन, उद्योग, वन तथा वातावरणमन्त्री विकास लम्सालका अनुसार प्रदेश सरकार यस विमानस्थलमा नियमित उडान भर्ने तयारीमा रहेको छ । यस क्षेत्रमा उडान भर्न सक्ने एक मात्र विमान चालक रहेको र निजी कम्पनी उडान भर्न तयार नहुँदा ढिलाइ भएको मन्त्री लम्सालको भनाइ छ ।

उता मनाङका पर्यटन व्यवसायी भने आशै आशमा निरास बनेका छन् । “स्थानीय तहको पहलमा परीक्षण उडान सफल भएपछि अब मनाङले पर्यटन क्षेत्रको विकासमा फड्को मार्ने आशा बोकेका थियौँ, तर नियमित उडान नहुँदा निराशाबाहेक केही हुन सकेको छैन,” मनाङ ङिस्याङ गाउँपालिका–५ का वडाध्यक्ष कर्मछिरिङ गुरुङले भने । उनले भने , “पर्यटक आउँछन् केही बिरामी परेर फर्कन्छन् । सडक पनि गतिलो छैन हेलीकोप्टर चार्टर गर्न महँगो पर्छ । कमसेकम नियमित उडान भइदिए धेरैले समयमा उपचार पाउने थिए ।”

विसं २०६९/७० मा यस विमानस्थल कालोपत्र बने पनि कुनै उडान भने भएको थिएन । “२०७६ भदौ २७ गते परीक्षण उडान सफल भएपछि भने निकै आशा बोकेका मनाङवासीलाई हात्ती आयो हात्ती आयो फुस्साजस्तो भएको छ, सरकारको चासो पुगे मनाङवासीसँगै पर्यटकलाई सहज हुने थियो,” गुरुङले भने । गण्डकी प्रदेशले सन् २०२० मा २० लाख पर्यटक भित्र्याउने लक्ष्य पूरा गर्न मनाङलाई विशेष रुपमा विकास गर्नुपर्ने स्थानीयवासी बताउँछन् ।(रासस)

© 2019, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

Bernhardt
सम्बन्धित खवर
टिप्पणिहरु
Loading...
Global Reach