पोखरा
ताण्डव न्यूज ।
गत पुस महिनामा पोखरा महानगरपालिका वडा नं २१ बसोबास गर्ने रश्मी रानाभाट नागरिकता प्राप्तिका लागि सिफरिस लिन वडा कार्यालय पुगिन् । सिफारिसका लागि आवश्यक कागजात बोकेर उनि वडा कार्यालय पुगेकी थिइन् ।
वडाका अध्यक्ष दीपक सुवेदी महानगरकै काम बिशेषमा वडा बाहिर निस्कनु पर्ने भएकाले वडा सदस्य विमला केसी चालिसेलाई कार्यवाहक वडाध्यक्षको जिम्मेवारी दिए ।
नागरिकता सिफारिसका चाहिने जन्मदर्ता, शैक्षिक प्रमाण लिएर रानाभाट परिवार कार्यवाहक वडाध्यक्ष चालिसे समक्ष पुगे । चालिसेले सिफारिसका लागि चाहिने जन्मदर्ता, शैक्षिक प्रमाणपत्र, साक्षी हेरेपछि कानुन अनुसार नै सिफारिस दिइन् । जन्मदर्ता र शैक्षिक प्रमाणपत्रमा निवेदन अनुसार नै बुवाको नाम ज्ञान बहादुर रानाभाट र आमाको नाम तारा देवी रानाभाट देखिएपछि उनले सिफारिसका लागि हस्ताक्षर गरकी थिइन् ।
सोही सिफारिसका आधारमा जिल्ला प्रशासन कार्यालय कास्कीले पुस २१ गते रश्मी रानाभाटको नाममा नागरिकता जारी गर्यो ।
अहिले रानाभाटका छिमेकीहरुले उक्त रश्मी रानाभाट, ज्ञान बहादुर र तारा देवीको छोरी नभएको भन्दै विरोध जनाएका छन् । उक्त विरोधको स्वर जिल्ला प्रशासनसम्म पुगेको छ ।
नागरिकताबारे किचलो सुनेपछि प्रशासनले अहिले वडा कार्यालयलाई ‘यस बारे खुलाई पठाइदिन’ पत्र पठाएको छ ।
कागजपत्रको आधारमा कानुन अनुसार नै सिफारिस गरेका हौँ : वडाध्यक्ष सुवेदी
पोखरा २१ का वडाध्यक्ष दीपक सुवेदीले सिफरिस कानुन अनुसार नै भएको बताए । नागरिकता सिफारिसका लागि पेश गरिएको आवश्यक कागजपत्र कानुन अनुसार नै देखिएकाले सिफारिस दिइएको उनको भनाई छ । ‘हामीले हेर्ने भनेको शैक्षिक प्रमाणपत्र, जन्मदर्ता, साक्षी नै त हो । अब जन्मदर्तामा पनि, शैक्षिक प्रमाणपत्रमा पनि आमा बुवाको नाम सोही अनुसार छ ।’ उनले भने ।
‘उहाँहरुको छोरी होइन भन्ने छ नि ?’ भन्ने प्रश्नमा उनले यस विषयमा बल्ल अहिले आएर जानकारी भएको बताए । उनले भने‘यो हल्ला भएपछि बल्ल थाहा भएको हो । यसबारे जिल्ला प्रशासनले पनि हामीलाई विषय खुलाई पठाउन पत्र पठाएको छ । अब हामी उहाँ (ज्ञान बहादुर र तारा देवी)लाई प्रशासनमै पठाइदिन्छौँ । अगाडीको काम कारवाही प्रशासनको आदेश अनुसार नै हुन्छ ।’
यता कार्यवाहक वडाध्यक्षको हैसियतमा सिफरिस दिएकी वडा सदस्य विमला केसी चालिसेले पनि कागजकै आधारमा सिफारिस दिएको जनाइन् । ‘हामीले कागजात नै हेर्ने हो नी । जन्मदर्ता छ । उहाँहरु स्वयं उपस्थित हुनुहुन्छ । सबै कागजात रुजु गरेपछि ठिक छ भन्ने भएर सिफारिस दिएकी हुँ’ उनले भनिन् ।
कागजपत्र हेर्दा वडाध्यक्ष सुवेदीले भने अनुसार नै रश्मी रानाभाट नाम गरेकी युवतीले २०७६ मा एसईई उत्तिर्ण गरेको शैक्षिक प्रमाणपत्रमा बुवाको नाम ज्ञान बहादुर रानाभाट र आमाको नाम तारा देवी रानाभाट नै छ । यस्तै जन्मदर्तामा पनि सोही अनुसार आमा बुवाको नाम उल्लेख छ । सिफारिसका क्रममा चाहिने साक्षीले पनि रश्मीका आमा बुवा उनै हुन् भनेर हस्ताक्षर गरेका छन् ।
यसबारे वडा कार्यालयलाई खुलाएर पठाउन भनिएको र आमा बुवा भनिएका ज्ञान बहादुर र तारा देवीलाई पनि डाकेर प्रक्रिया अघि बढाइने प्रशासनले जनाएको छ ।
नागरिकता प्राप्त गरेकी रश्मी अहिले क्यान्सरसँग जुधिरहेकी छिन् । उनको पाठेघरमा क्यान्सर देखिएपछि भरतपुरस्थित क्यान्सर अस्पतालमा उपचार भइरहेको छ ।
© 2023, Tandav News. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.