तनहुँ।
तनहुँको भीमाद नगरपालिका–९ पाथार्दीका बाख्रापालक किसान शिव आले ‘युथ एग्री अवार्ड–२०२२’ बाट पुरस्कृत भएका छन्। साना किसान लघुवित्त वित्तीय संस्था र इजरायल राजदूतवासद्वारा बिहीबार काठमाडौँमा आयोजित कार्यक्रममा उनलाई रु एक लाखसहित पुरस्कृत गरिएको हो ।
‘सिक र कमाउ’ कार्यक्रमको १०औँ वार्षिकोत्सवका अवसरमा कृषि तथा पशुपक्षी मन्त्री मृगेन्द्रकुमार सिंह यादवले आलेलाई पुरस्कृत गर्नुभएको हो । विसं २०६८ देखि उन्नत बोयर जातका बाख्रापालन व्यवसाय गर्दै आएका आलेलाई जिल्लाका विभिन्न सङ्घसंस्थाले पनि यसअघि सम्मान तथा पुरस्कृत गरिसेकेका छन् ।
साना किसानमार्फत अध्ययनका लागि इजरायल पुगेका किसानमध्येबाट आवेदन गरिएकामा नेपालभरिबाट तीन सय जनाले आवेदन दिएका थिए । उक्त आवेदन दिएकामध्ये २१ जना छनोट भएका थिए । अन्तिममा सात प्रदेशबाट एक–एक जनालाई पुरस्कृत गरिएको आलेले जानकारी दिए। गण्डकी प्रदेशबाट आले मात्रै पुरस्कृत भएका हुन।
भीमादको पाथार्दीमा बोर बाख्रापालनका लागि स्रोत केन्द्र स्थापना गरिएको छ । उक्त गाउँका ६० परिवार बाख्रापालन व्यवसायमा आवद्व छन् । आलेको फार्ममा हाल ५० माउसहित एक सय हाराहारीमा बाख्रा छन् । उनले गत वर्ष मात्रै रु २४ लाखको बाख्रा बिक्री गरेको बताए।
रासस
–––
© 2022, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.