पाेखरा।
गण्डकी प्रदेशका मुख्यमन्त्री खगराज अधिकारीले व्यवसायीको सफलताले नै ‘सुखी नेपाली, समृद्ध नेपाल’ अभियानमा सहयोग पुग्ने बताएका छन्। होटल पौवाको ११औँ शाखाको आज पोखरामा उद्घाटन गर्दै मुख्यमन्त्री अधिकारीले उद्योग व्यवसाय सफल भएमात्र व्यवसायी सफल हुन्छन् र उनीहरुको सफलताले नै समृद्ध नेपाल निर्माण गर्न सहयोग पुग्ने बताए।
सामूहिक लगानीबाट गरिएको व्यवसायले देशमा रोजगारी सिर्जना गर्ने र यसबाट वैदेशिक रोजगारीमा जानुपर्ने बाध्यतालाई स्वदेशमै रोक्ने पनि उनले बताए। “मुलुक राजनीतिक अस्थिरतामा फसेको छ, युवा विदेश पलायनमा लागेका छन्”, मुख्यमन्त्री अधिकारीले भने, “सामूहिक लगानीमा सुरु गरेको व्यवसायले देशमा रोजगारीका अवसरसँगै व्यापार व्यवसायले मुलुकमा अर्थतन्त्रको विकास भई समृद्ध नेपालमा सहयोग पुग्दछ ।”
कार्यक्रममा पर्यटन व्यवसायी गणेश भट्टराईले राजनीनिक अस्थिरताले अर्थव्यवस्थामा असर परेको बताए। “राजनीतिककर्मी देश सञ्चालनभन्दा राजनीतिक भागबन्डामा लाग्दा युवा नागरिकले नेपालमा भविष्य देखेनन्, राजनीतिकर्मीले देश सञ्चालनमा ध्यान नदिँदा राजनीतिक अस्थिरताले अर्थव्यवस्थामा असर परेको छ ।” उनले भने ।
उनले देशको कठिन परिस्थितिमा पनि व्यवसायमा लगानी गर्नु एक चुनौतीपूर्ण काम हो भन्दै यस्ता कार्यमा सरकारले आवश्यक सहयोग गरी व्यावसायिक वातावरण निर्माण गर्नुपर्ने सुझाव दिए। ‘मिशन सय’ यात्रामा निरन्तर अगाडि बढेको होटल पौवाले नेपालमा कम्तीमा पनि एक सय वटा होटल स्थापना गर्ने लक्ष्य लिएको छ । सो होटल व्यवस्थापनले गएको सात वर्षमा होटलको ११औँ शाखा पोखरामा सञ्चालनमा ल्याएको निर्देशक विष्णु ज्ञवालीले जानकारी दिए।
सात वर्ष अगाडि रुपन्देहीको सालझन्डीबाट सुरु गरेको एक सय मिसनको यात्रा ११औँ शाखाका रुपमा पोखरामा सञ्चालन गर्न पाउँदा खुसी लागेको भन्दै उहाँले कर्णालीको जुम्लादेखि गण्डकीको पोखरासम्म गरी पाँच प्रदेशमा होटलको शाखा पु¥याएको बताए।
उनले होटल पौवा प्रालीले १२औँ शाखा काठमाडौँमा खोल्ने तयारी गरेको जानकारी पनि दिए। करिब रु १० करोडको लगानीमा पौवा प्रालीले पोखराको लेकसाइड स्ट्रिट नम्बर १ मा होटल पौवा सञ्चालनमा ल्याएको हो ।
पौवाले आजदेखि तीन दिनसम्म होटलमा स्वाद उत्सवको आयोजना पनि गरेको छ । यसै क्रममा शनिबार गजलकार थानेश्वर गौतमको एकलसाँझको आयोजना गरिएको पनि होटल पौवा प्रालीले जानकारी दिएको छ ।
रासस
© 2023, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.