www.tandavnews.com
Fact ~ In search of truth

पोखरा महानगरको बजेटबारे सांसदसँग छलफल

hima aus

पोखरा ।

पोखरा लेखनाथ महानगरपालिकाको तेस्रो नगरसभा असार १० गतेदेखि सुरु हुँदैछ । नगर सभामा प्रस्तुत गर्ने नीति, कार्यक्रम, योजना र बजेटको तयारीमा महानगर जुटेको छ । नीति तथा कार्यक्रममा समावेश गर्नुपर्ने योजनाको बारेमा महानगरपालिकाले कास्कीका प्रदेश र संघीय सांसदसँग बुधबार छलफल गरेको छ ।

महानगरपालिका मेयर मानबहादुर जिसीको अध्यक्षतामा भएको कार्यक्रममा सांसदहरुले स्मार्टसिटीको पूर्वाधारलाई प्राथमिकता दिएर नीति, कार्यक्रम, योजना र बजेट बनाउन सुझाव दिएका छन् । उनीहरुले जनताले विकास र सुुशासन चाहेकोले त्यसलाई ध्यानमा राखेर बजेट ल्याउनु पर्ने सुझाव दिए ।

कास्की क्षेत्र नम्बर एक बाट संघीय संसदमा निर्वाचित सांसद खगराज अधिकारीले विजयपुर खोलामा पुलहरु थप्नुपर्ने र चौडाइ ४ लेनको बनाउनेतर्फ महानगरको ध्यानाकर्षण गराएका छन् । बाइपास सडक बनाएर पोखराको ट्राफिक जामलाई घटाउने योजना महानगरपालिकाले ल्याउनुपर्ने उनको भनाइ छ । ‘पोखरामा पर्यटन विश्वविद्यालयको खाँचो छ,’ अधिकारीले भने,‘ ताल संरक्षणको साथै महानगरका सबै वडालाई जोड्ने सडक सञ्जाल विस्तारमा विशेष ध्यानदिनु पर्छ ।’

प्रदेश सभाका सांसद कृष्ण थापाले चुनावी घोषणपत्रमा समेटिएका योजनालाई पूरा गर्ने गरी बजेट ल्याउनुपर्ने बताए । ‘पोखराका डाँडाकाँडालाई ग्रीन सेटेलाइट सिटी बनाउनुपर्छ,’ थापाले भने,‘ समग्र पोखराको विकासको गुरु योजनालाई बनाएर अगाडि बढेमात्र स्मार्टसिटी बन्न सक्छ ।’

सांसद दीपक कोइरालाले साविकको लेखनाथ नगरपालिकाका बासिन्दालाई महानगरको अनुभूति हुनेगरी योजना बनाउनुपर्ने बताए । ‘तालहरुको संरक्षणको लागि गुुरु योजना आवश्यक छ,’ कोइरालाले भने, ‘जनताको जीवनस्तर परिर्वतन हुने गरी बजेट ल्याउनुपर्छ ।’

अर्का सांसद मनबहादुर गुरुङले विजयपुरको किनारै÷किनार सडक बनाउनु पर्ने बताए ।उनले पोखरादेखि २ घण्टाको यात्रामा हिउँ छुन सकिने ठाउँहरु भएकाले तिनीहरुलाई पर्यटकीय गन्तव्यको रुपमा विकास गर्नुपर्ने बताए ।

सांसद विन्दुकुमार थापाले पोखराले भु उपयोग र जल उपयोग नीति ल्याउनुपर्ने बताए । सार्वजनिक जग्गाको संरक्षण, सुकुम्बासी समस्या समाधान, करदाता मैत्री सुशासन लगायत समग्र पोखराको गुरुयोजना बनाउनुपर्ने बताए ।

classic tech

अर्का सांसद राजीव पहारीले जनताले सुशासन र विकास चाहेकोले त्यसलाई ध्यानमा राखेर सन्तुलित विकास गर्नुपर्ने बताए । उनले चाक्ला सडक र पार्किङ स्टेसन बनाउन पनि महानगरलाई सुझाव दिए ।

सांसद रामजी बराल जीवनले सेवालाई प्रभावकारी बनाउनुपर्ने बताए । ‘जनताको घरमा बोरामा फोहोर कुहाएर राख्नुपर्ने बाध्यताको अन्त्य गर्नुपर्ने उनको जोड छ । २४ सै घण्टा धारामा पानी आउने गरी योजना बनाएर काम गर्न उनले सुझाव दिए ।

सांसद मित्रकुमारी गुरुङ सुवेदीले खानेपानी व्यवस्थापनलाई र महिला कानुनी परामर्शलाई प्रभावकारी बनाउनेतर्फ ध्यान दिनुपर्ने बताइन् ।

सांसद गायत्री गुरुङले एतिहासिक कोटहरुलाई पर्यटकीय गन्तव्यको रुपमा विकास गर्नुपर्ने बताइन् ।

सांसद पुष्पा केसी भण्डारीले बजारलाई सफा राख्नको लागि प्लास्टिकको विकल्प खोज्नुपर्ने बताइन् ।

पोखरा लेखनाथ महानगरपालिकाका प्रमुख प्रशासकीय अधिकृत शेषनारायण पौडेलले विभिन्न ५ वटा समिति बनाएर नीति, कार्यक्रम र बजेट निर्माणको काम भइरहेको बताए ।

नगरसभा पोखरा सभागृहमा हुने वरिष्ठ कानुन अधिकृत नारायण शर्माले जानकारी दिए ।बजेटका बारेमा महानगरपालिकाले विभिन्न क्षेत्रका विज्ञहरुसँग छलफल गरिरहेको छ ।

© 2018, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।

सम्बन्धित खवर
टिप्पणिहरु
Loading...
SKIP add