वीरगंज ।
वन तथा वातावरण मन्त्री प्रदीप यादवले पाकाका अनुभव र युवाको जोस जाँगरलाई सही सदुपयोग गर्न सके देश विकासमा ठुलो टेवा पुग्ने बताए छन्।
वीरगंजबाट प्रकाशित मध्यनेपाल मिडिया प्रालिको छैँठौ वार्षिकोत्सवको अवसरमा आयोजित ’नेतृत्वमा युवा की पाका” विषयक अन्तर्क्रिया कार्यक्रमलाई सम्बोधन गर्दै मन्त्री यादवले समय र परिस्थिति अनुसार देश र समाजका लागि युवा र पाका व्यक्ति दुवैको आवश्यकता रहेको कुरामा जोड दिए।
उनले राजनीति लगायत हरेक क्षेत्रमा युवाको सृजनशीलता र पाकाको अनुभवको सही प्रयोग गरेर देशलाई समृद्ध बनाउन सकिने बताउँदै पाका उमेरका व्यक्तिहरू युवासँग भएको प्रविधि र ज्ञानको भरपुर सदुपयोग गर्न हिचकिचाई रहेको भन्दै दुःख व्यक्त गरे।
कार्यक्रममा पर्साका प्रमुख जिल्ला अधिकारी उमेश कुमार ढकालले युवा तथा पाका दुवै थरीका व्यक्तिले राष्ट्र सञ्चालन लगायत हरेक क्षेत्रमा राम्रो काम गर्न सक्ने दाबी गर्दै पाकाका अनुभव, ज्ञान सिपलाई युवामा परिमार्जित गर्दै युवा उमेर समूहकालाई अबका दिनमा राजनीतिमा समेत प्राथमिकता दिनुपर्ने कुरामा जोड दिए।
कार्यक्रममा वीरगंज उद्योग वाणिज्य संघका अध्यक्ष डा.सुबोध गुप्ताले युवा मात्र नभई महिलाको सहभागिता र सक्रियता समाजका हरेक क्षेत्रमा हुनु पर्ने कुरामा जोड दिँदै युवा र महिलाको सहभागिता विनाको समाजले उन्नति गर्न नसक्ने दाबी गरे।
रासस
© 2022, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.