लमजुङ
ताण्डव न्यूज ।
गण्डकी प्रदेशका मुख्यमन्त्री पृथ्वीसुब्बा गुरुङले अत्यात्मको विकास हुनुपर्ने बताएका छन् ।
लमजुङको करापुटार स्थित ईशानेश्वर महादेव मन्दिरमा साउनको अन्तिम सोमबारको अवसरमा विशेष पुजा आजापछि आयोजित कार्यक्रममा बोल्दै मुख्यमन्त्री गुरुङले उक्त कुरा बताएका हुन् । “भौतिक विकासले मात्र समाज समृद्ध हुँदैन, उनले भने, आध्यात्मिक भावनाको विकास गर्न सके मात्र वास्तविक रुपमा समृद्धी हाासिल हुन्छ ।”
![Batas](https://www.tandavnews.com/wp-content/uploads/2022/04/Batas.jpg)
सरकारले सामाजिक विकासका योजना अघि सारेको बताउँदै मुख्यमन्त्री गुरुङले अध्यात्मको विकासले सामाजिक सेवा र एकताको भावना जागृत हुने विशवास व्यक्त गरे ।
प्रदेशमा रहेका धार्मिक क्षेत्रको विकास गरी पर्यटन प्रवद्र्धन गर्ने प्रदेश सरकारको निति रहेको उनको भनाई छ । ईशानेश्वर क्षेत्रको विकास र प्रवद्र्धनमा प्रदेश सरकारले सहयोग गर्ने भन्दै उनले योजना लिएर आउन आग्रह समेत गरे । ईशानेश्वर महादेवको महिमाको प्रर्वद्धन हुन नसकेको भन्दै उनले ठोस योजना बनाएर अघि बढ्न सरकार तयार रहेको बताए ।
धार्मिक पर्यटनको विकास मार्फत स्थानीयबासीको आयआर्जन हुनुपर्ने भन्दै मुख्यमन्त्री गुरुङले गण्डकी प्रदेशमा अध्यात्म पर्यटनको विकास गर्ने योजना रहेको बताए । कार्यक्रममा बोल्दै गण्डकी प्रदेशका प्रमुख सचिव नारायण प्रसाद विडारीले ईशानेश्वर महादेवको महिमा अन्यत्र नरहेको भन्दै यसको व्यवस्थापन गर्नुपर्ने बताए ।
यस्तै, मध्यनेपाल नगरपालिकाका मेयर रमेश पाण्डेले मुख्यमन्त्री पृथ्वीसुब्बा गुरुङले देखेको समृद्धीको सपना सबै प्रदेशबासीको सपना रहेको बताए । प्रदेश सरकारसँग हातेमालो गर्दै अघि बढ्न नगरपालिका तयार रहेको भन्दै उनले अब समृद्ध नगरपालिका र प्रदेश बनाउने गरी अघि बढ्नुपर्ने धारणा राखे ।
कार्यक्रममा ईशानेश्वर क्षेत्र विकास समितिका अध्यक्ष रामचन्द्र घिमिरे शास्त्रीले ईशानेश्वर महादेव मन्दिरको महिमाका बारेमा जानकारी गराएका थिए । सो अवसरमा मध्यनेपाल नगरपालिकाका उपमेयर राजकुमार श्रेष्ठ, क्होंलासोँथर गाउँपालिकाका उपप्रमुख कुमारीमुनि गुरुङ लगायत स्थानीय जनप्रतिनिधी र भक्तजनहरुको उपस्थिति रहेको थियो ।
“यो बर्ष आस गर्नु, अर्को बर्ष भर पर्नु”
मुख्यमन्त्री गुरुङले आफ्नो निर्वाचन क्षेत्र समेत रहेको करापुटार क्षेत्रका विभिन्न आयोजनाको अनुगमन समेत गरे । मुख्यमन्त्री गुरुङले इशानेश्वर स्थित चिसँकु स्वास्थ्य चौकीका समस्याका बारेमा जानकारी लिएका थिए ।
सो अवसरमा स्वास्थ्यचौकीका प्रमुख विश्वराज घिमिरेले दरबन्दी अनुसारको कर्मचारी नभएको, फर्निचर लगायत पुर्वाधारको अभाव, स्वास्थ्यचौकीको स्तरोन्नती गर्नुपर्ने लगायतका समस्या जनाएका थिए ।
उनका अनुसार स्वास्थ्यचौकीमा अहिले दैनिक ३५ जनादेखि ७० जनासम्म विरामी आउने गरेका छन् ।
सो अवसरमा बोल्दै मुख्यमन्त्री गुरुङले स्वास्थ्यचौकीको समस्या समाधान हुने गरी योजना ल्याउन निर्देशन दिएका छन् । मुख्यमन्त्री गुरुङलाई सोमबार नै रामबजार खानेपानी तथा सरसफाई उपभोक्ता समितिले सम्मानका साथै आफ्ना समस्याका बारेमा जानकारी गराएको थियो । सो अवसरमा खानेपानी आयोजना निर्माणमा सहयोग गर्न उपभोक्ता समितिले आग्रह गरेको थियो ।
मुख्यमन्त्री गुरुङले दुई बर्षभित्र प्रदेशभित्र आधारभुत खानेपानीको सुविधा पु¥याउने योजना रहेको दोहोर्याए । “यसबर्ष हामी सर्भे गर्छौ, उनले भने, अर्को बर्ष योजना सम्पन्न गर्ने गरी बजेट विनियोजन गर्छौ ।”
सो अवसरमा मुख्यमन्त्री गुरुङलाई पञ्चबुद्ध तमु समाज सेवा, तामाङ महिला समुह र विशवकर्मा महिला समुहले पनि छुट्टा छुट्टै सम्मान गरेका थिए ।
सो अवसरमा उनीहरुले आ–आफ्ना सामुदायिक भवनलाई सहयोग गर्न आग्रह गरेका थिए । सो अवसरमा मुख्यमन्त्री गुरुङले यस बर्ष प्रदेश सरकारले रोजगारी सृजना, उत्पादन वृद्धी र गरिवी निवारण हुने खालका योजनामा मात्र बजेट विनियोजन गरेको बताए ।
प्रदेश सरकारले निति, कार्यक्रम र बजेट ल्याइसकेको भन्दै सामुदायिक भवनलाई सहयोग गर्ने गरी बजेट विनियोजन नभएको बताए । यसबर्ष कुनै योजना कारणबश पुरा हुन पाएन भने रकामान्तर गरेर केही सहयोग गर्न सकिने बताए । उनले आगामी बर्षको बजेटमा समुदायलाई फाइदा हुने गरी बजेटको व्यवस्था गर्ने प्रतिवद्धता जनाउँदै थपे, “यस बर्ष आश गर्नु, अर्को बर्ष भर पर्नु ।”
यस बर्षको बजेटमा पुर्वाधार विकास र आर्थिक उपार्जनका योजनामा धेरै बजेट विनियोजन गरिएको मुख्यमन्त्री गुरुङले जानकारी दिएका थिए ।
© 2018, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.