रामबहादुर थापा
पोखरामा एकै मञ्चबाट ८० देशका राष्ट्रगान गाउने तयारीमा कोभिड–१९ को दोस्रो लहरका कारण बिराम लागेपछि विश्व राष्ट्रगान यात्री रामजी नेपाली अहिले गृहजिल्ला फर्किए ।
गायक नेपालीले कोरोना महामारीले विश्वयात्रामा त अवरोध खडा गर्यो नै देशभित्रै पनि निष्फिक्री घुम्न पाएका छैनन् । मानिस भेला पारेर कार्यक्रम गर्नु त झनै टाढाको कुरा । पर्यटकीय सहर पोखराको फेवाकिनारमा उभिएर विभिन्न देशका राष्ट्रगानमार्फत विश्व बन्धुत्व, सांस्कृतिक पर्यटन र सद्भावनाको सन्देश प्रवाह गर्ने उनको योजना तत्काललाई पर सरेको छ । महामारी थामिएर स्थिति सहज हुनासाथ कार्यक्रमको चाँजोपाँचो मिल्नेमा उनी निर्धक्क छन् । पोखराका स्थानीय आयोजक संस्था र शुभेच्छुकले पनि कार्यक्रम गरी छाड्ने वचन उनलाई दिएका छन् ।
कुनैताका ‘दोहोरी’ र ‘लोकपप’ गाउँदै हिँड्ने गायक नेपालीको अहिले मूल विधा नै राष्ट्रगान भएको छ ।
लम्बिँदो निषेधाज्ञाबीच केहीसमय घरमै बसेर ध्यान, साधना गर्ने र राष्ट्रगान गाउने अभ्यासलाई निरन्तरता दिन जन्मथलो फर्केको नेपालीले सुनाए । महामारीका बेला लामो यात्रा तय गर्न नपाए पनि उनले नजिकका गन्तव्य चहार्ने, पर्यटन प्रवद्र्धनमा स्थानीयवासीसँग हातेमालो गर्ने र आफ्नो राष्ट्रगानको अभ्यासलाई निरन्तरता दिँदै आएका छन् ।
यही सिलसिलालाई नेपालीले यसपालि काठेखोला गाउँपालिका–३ धम्जा र म्याग्दीको बेनी नगरपालिका–३ भकिम्लीको सीमामा पर्ने पर्यटकीय लेक बेलढुंगासँग जोड्एि । गत सप्ताहन्तमा पर्यटनकर्मी र पत्रकारकासाथ पुगेका उनले बेलढुंगामा उभिएर राष्ट्रगान गाएका थिए । आफ्नो विश्वयात्राको सन्देश दिए । त्यहाँ उनले नेपालसहित छिमेकी देश भारत, चीन, मित्रराष्ट्र अमेरिका र फ्रान्सको राष्ट्रगान गाएका थिए । ४० वर्षीय गायक नेपालीले पर्यटकीयस्थलबाट प्रतिकात्मकरुपमा सन्देश जाओस् भनेर राष्ट्रगान गाएको बताए ।
समुद्रीसतहदेखि २६१४ मिटरको उचाइमा अवस्थित बेलढुंगाबाट राष्ट्रगान गाउँदा आनन्दको अनुभूति भएको नेपालीले सुनाउँछन् । ‘देशविदेशका धेरै समारोहमा मैले राष्ट्रगान गाएको छु, यहाँ उभिएर गाउँदा नयाँ र रोमाञ्चक अनुभव सँगाले’, उनी भन्छन् ।
बेलढुंगा एउटा उदाउँदो पर्यटकीय गन्तव्यस्थल हो । त्यसको प्रवद्र्धनमा बागलुङ र म्याग्दी दुवैतर्फबाट प्रयास भइरहेको छ । ‘प्राकृतिक दृश्यावलोकन’ स्तम्भका रुपमा चिनिने बेलढुंगा पदयात्रासहित सूर्योदय र मनोरम हिमशृंख्ला अवलोकनका लागि पर्यटकको रोजाइमा पर्छ । त्यहाँ अहिले पर्यटनमैत्री हिसाबले पूर्वाधार बनिरहेका छन् ।
कुनैताका ‘दोहोरी’ र ‘लोकपप’ गाउँदै हिँड्ने गायक नेपालीको अहिले मूल विधा नै राष्ट्रगान भएको छ । विश्वका सबै देशका राष्ट्रगान गाउने ध्याउन्नमा उनी छन् । नेपालीको संगीत अभ्यास र साधना पनि त्यसमै केन्द्रित छ । यात्रामा हुँदा होस् या विस्तारामा निदाउनुअघिसम्म उनी राष्ट्रगानको अभ्यासमै लिप्त हुन्छन् ।
नेपालीले अहिले १ सय ३० देशका राष्ट्रगान गाउन सक्छन् । बागलुङ नगरपालिका–६ भीरलात्तुरीका नेपाली ‘विश्व बन्धुत्व, सांस्कृतिक पर्यटन र सद्भावना’ को सन्देशसहित २५ देशका राष्ट्रगान गाउँदै सन् २०१७ देखि विश्वयात्रामा निस्केका थिए ।
संयुक्त राष्ट्रसंघका १ सय ९५ वटै सदस्य राष्ट्रका राष्ट्रगान गाउँदै विश्वका २ सय ३२ देश पुग्ने उनको महत्वकांक्षी सपना छ । सन् २०२५ भित्र विश्वयात्रा पूरा गर्ने उनको योजना कोरोनाकै कारण पछाडि धकेलिने देखिएको छ । विश्वभर एकाएक फैलिएको कोरोना महामारीका कारण उनले आफ्नो विश्वयात्राबीचमै स्थगन गर्नुपरेको थियो । भारतका ७ प्रान्त घुमेर बंगलादेश जाने क्रममा विसं २०७६ पुसमा सिलुगढीबाट नेपाली घर फर्किए ।
उनले सन् २०१७ मा बेल्जियम, फ्रान्स, स्पेन र नेदरल्यान्डका विभिन्न सहरमा राष्ट्रगान गाइसकेका छन् । चाँडै स्थिति ठिकठाक भए आफ्नो विश्वयात्रा फेरि सुरु हुनेमा नेपाली आशावादी देखिन्छन् । सबैभन्दा धेरै देशका राष्ट्रगान गाउनसक्ने गायकका रुपमा विश्व कीर्तिमान पनि राख्ने उनको लक्ष्य छ ।
संसारका अनेक भाषामा बनेका राष्ट्रगान गाउनु चुनौतीपूर्ण भए पनि त्यसलाई देश चिनाउने माध्यम र आफ्नो आत्म गौरवका रुपमा नेपाली स्वीकार छन् । नेपालीले गत वर्ष विश्व पर्यटन दिवसको सन्दर्भ पारेर यहाँ आयोजित समारोहमा एकै मञ्चबाट ५० देशका राष्ट्रगान गाएका थिए । रासस
© 2021, ताण्डव न्यूज. सर्वाधिकार सुरक्षित नोट : यस ताण्डव न्यूजबाट सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘ताण्डव न्यूज डटकम’बाट प्रेषित समाचार अनलाइन न्यूजहरुले जस्ताको तस्तै साभार गरेको पाइएकाले यो नगर्न हुन अनुरोध गर्दछौं । अन्यथा, बिनाअनुमति हाम्रा सामग्री प्रयोग गरे कानुनी कारबाहीमा जान बाध्य हुनेछौं ।
Comments are closed.